Լրատվամիջոցները հայտնել են Թրամփի ապօրինի երեխայի մասին

Ամերիկյան National Enquirer ամսագիրը 30.000 դոլար է վճարել նախագահ Դոնալդ Թրամփին պատկանող նյույորքան շենքերից մեկի նախկին դռնապանին, որը պատմել է Թրամփի՝ աշխատակցուհիներից մեկի հետ սիրավեպի ու դրա արդյունքում ծնված ապօրինի երեխայի մասին:

Ինչպես նշում է nypost.com-ը, ամսագիրը գումարը վճարել է 46-ամյա Դինո Սաջուդինին, որը 30.000 դոլարի դիմաց վաճառել է սկանդալային պատմությունը հրապարակելու իրավունքը: Այնուհանդերձ՝ National Enquirer-ն այն չի հրապարակել:

Կողմերի միջև կնքված պայմանագրի համաձայն՝ դռնապանը ստիպված կլինի 1 մլն դոլար վճարել, եթե ինչ-որ տեղ խոսի Թրամփի ապօրինի երեխայի մասին:

Սակայն ամերիկյան լրատվամիջոցներին ինչ-որ կերպ հաջողվել է իմանալ Սաջուդինի և National Enquirer-ի միջև կնքված պայմանագրի մասին:

«Այսօր ես արթնացա ու տեղեկացա, որ գաղտնի համաձայնությունը, որ ձեռք էի բերել The National Enquirer-ի հետ, արտահոսել է մամուլ:

Կարող եմ հաստատել, որ Trump World Tower-ում աշխատելու ժամանակ ինձ կարգադրված է եղել չվարկաբեկել Թրամփի նախկին աշխատակցուհուն՝ նախկինում նրանց միջև եղած հարաբերությունների ու դրանց արդյունքում ծնված երեխայի առնչությամբ»,-ասել է Սաջուդինը:

Նրա պատմության համաձայն՝ Թրամփը հղիացրել է ՄԱԿ-ի շտաբ-բնակարանի կողքին գտնվող Trump World Tower երկնաքերի աշխատակցուհիներից մեկին:

Աղբյուրը մանրամասնում է, որ Սաջուդինին գումարը վճարվել է 2016թ. սկզբին: Հետաքրքրական է, որ դրանից 8 ամիս անց Թրամփի փաստաբաններից մեկը 150.000 դոլար է վճարել Playboy ամսագրի մոդել Կարեն ՄքԴուգալին՝ Թրամփի հետ ունեցած սիրավեպի մասին լռելու դիմաց:

Մինչդեռ National Enquirer-ի գլխավոր խմբագիր Դիլան Հովարդը խոստովանել է Սաջուդինին վճարելու փաստը, բայց միևնույն ժամանակ նշել է, որ այդ պատմությունը ճշմարտացի չէ, քանի որ հիմնավոր ապացույցների պակաս կա: