Ցուկերբերգը ներողություն է խնդրել Facebook-ից տվյալների արտահոսքի համար

Facebook սոցիալական ցանցի հիմնադիր Մարկ Ցուկերբերգը ներողություն է խնդրել, որ ընկերությանը չի հաջողվել սոցցանցի և Facebook-ի այլ ծառայությունների օգտատերերի համար ապահովել անձնական տվյալների պաշտպանության անհրաժեշտ մակարդակ, հաղորդում է Reuters գործակալությունը:

Նշվում է, որ երկուշաբթի՝ ապրիլի 9-ին, նա հանդիպել է սենատորների հետ, որոնց առաջ հանդես կգա Facebook-ի միլիոնավոր օգտատերերի տվյալների նկատմամբ չարաշահման հարցով լսումների ժամանակ:

«Մենք հստակ չենք գիտակցել, թե ինչ պատասխանատվություն ենք ունեցել: Դա իմ սխալն է եղել, և ես ցավում եմ դրա համար»,- ասված է Ցուկերբերգի գրավոր հայտարարությունում:

Նա հավելել է, որ ընկերությունում «բավարար քայլեր չեն ձեռնարկել Facebook-ի գործիքներն ի վնաս օգտագործելը կանխելու համար»:

«Ես հիմնել եմ Facebook-ը, ես կառավարում եմ և պատասխանատու եմ այն ամենի համար, ինչ այստեղ տեղի է ունենում»,- ընդգծել է նա:

 Ավելի վաղ հայտնի է դարձել, որ Facebook-ի օգտատերերի անձնական տվյալների զանգվածային արտահոսքի հետևանքով բրիտանական Cambridge Analytica ընկերության մոտ կարող է հայտնված լինել Facebook-ի 87 միլիոն օգտատիրոջ անձնական տվյալ: Այդ միջադեպի առնչությամբ ընկերությունը հայտնվել է մասշտաբային սկանդալի էպիկենտրոնում, իսկ Ցուկերբերգին հրավիրել են Կոնգրեսում հատուկ լսումների: