Նոր բախումներ պաղեստինցիների ու Իսրայելի միջև․ առնվազն 7 մարդ զոհվել է, 150-ը՝ վիրավորվել

Իսրայելի և պաղեստինյան Գազայի հատվածի սահմանին ուրբաթ օրը նորից բախումներ են տեղի ունեցել: Հաղորդվում է առնվազն 7 զոհի և 150 վիրավորների մասին: Ըստ պաղեստինյան կողմի՝ զոհերի թվում 16-ամյա անչափահաս կա և մեկ լրագրող:

Հազարավոր պաղեստինցիներ նորից փորձել են հատել սահմանը և գրոհել Իսրայելի սահմանապահ հենակետերը: Իսրայելի զինծառայողները արցունքաբեր գազ ու ռետինե փամփուշտներ են կիրառել, ինչպես նաև կրակ բացել մարտական զենքերից:

Վերջին շրջանում սա արդեն երկրորդ անգամն է, երբ հազարավոր պաղեստինցիներ փորձում են «Վերադարձի մեծ արշավ» անցկացնել, ինչը դրդում է «Համաս» ռազմականացված խմբավորումը: Մարտի 30-ից մինչև հիմա մոտավորապես երեք տասնյակ պաղեստինցի է զոհվել:

ՄԱԿ-ի Մարդու իրավունքների գրասենյակը Իսրայելին մեղադրել է անհամաչափ ուժ կիրառելու մեջ և կոչ արել հետաքննել միջադեպերը: Իսրայելը հերքում է մեղադրանքները:

azatutyun.am