Պուտինը նման է Հիտլերին. ռուս քաղաքագետը՝ ՌԴ նախագահի ելույթի մասին

ՌԴ Դաշնային խորհրդին նախագահ Վլադիմիր Պուտինի ուղերձն իր հռետորաբանությամբ հիշեցնում է նացիստների առաջնորդ Ադոլֆ Հիտլերին: Այդ մասին ուկրաինական «Західний погляд» հաղորդման ժամանակ հայտարարել է ռուս հրապարակախոս և քաղաքագետ Անդրեյ Պիոնտկովսկին, հաղորդում է obozrevatel.com-ը:

Պիոնտկովսկիի կարծիքով՝ ռազմավարական տեսանկյունից այդ ելույթը ոչինչ չէր նշանակում:

«Այդ «ներկայացման» մեջ ամենասարսափելին ինքը՝ Պուտինը չէր, այլ նրա լսարանը՝ ռուսական էլիտան, որը ողջունում էր նրան ծափողջույններով… Դա ինչ-որ բանով հիշեցնում է Հիտլերին… Բայց մեծ տարբերություն կա՝ 1944 թվականին Հիտլերը և նրա սպաները չունեին միլիարդավոր դոլարներ բրիտանական, ֆրանսիական և ամերիկյան բանկերում, նրանց երեխաները, կանայք, սիրուհիները չէին վայելում կյանքն Արևմուտքում»,- ընդգծել է ռուս հրապարակախոսը:

«Դա մարդու հիմար ելույթ էր, որը չի հասկանում միջուկային ռազմավարությունից: Նա ցանկանում էր համոզել Արևմուտքին և ամբողջ աշխարհին, որ Ռուսաստանը կարող է լինել ԱՄՆ-ի լուրջ հակառակորդ: Մենք դա տեսել ենք վերջին 50 տարիների ընթացքում՝ այն ժամանակվանից, երբ ԽՍՀՄ-ը սկսեց սպառնալ ԱՄՆ-ին՝ Կուբայում հրթիռներ տեղակայելով: Նրանք պնդում էին, որ կարող են ամբողջությամբ ոչնչացնել ԱՄՆ-ն, բայց Ամերիկան նույն կերպ կարող է ոչնչացնել Ռուսաստանը»,- նշել է նա:

Բացի այդ, քաղաքագետի խոսքով, չափազանց դժվար է պատկերացնել, թե ինչպես ռուսները կարող են նոր միջուկային զենք մշակել այնպիսի պայմաններում, երբ ամբողջությամբ կախված են Արևմուտքից:

Հիշեցնենք, որ Դաշնային խորհրդին ուղղված ուղերձում նախագահ Պուտինը ներկայացրել էր միջուկային էներգահամակարգով հրթիռ, որն անխոցելի է հակահրթիռային և հակաօդային պաշտպանության համակարգերի համար: Պուտինը նաև հայտնել էր, որ Ռուսաստանն ունի հիպերձայնային զենքեր՝ «Ավանգարդ» և «Կինժալ» համալիրներ, ինչպես նաև միջուկային ինքնակառավարվող սուզանավեր, մարտական լազերներ, բացի այդ՝ սկսվել են նոր միջմայրցամաքային բալիստիկ «Սարմատ» հրթիռների փորձարկումները: