Ռուսաստանցի հաքերը կարտահանձնվի այն պետություն, որի դեմ առավել լուրջ հանցագործություն է կատարել

Չեխիայի արդարադատության նախարար Ռոբերտ Պելիկանը հայտարարել է, որ 2016-ի հոկտեմբերից չեխական բանտում գտնվող ռուսաստանցի հաքեր Եվգենի Նիկուլինը կարտահանձնվի այն պետություն, որի դեմ առավել լուրջ հանցագործություն է կատարել:

Նիկուլինի արտահանձնումը պահանջում են թե՛ Ռուսաստանը, և թե՛ Միացյալ Նահանգները:

Վաշինգտոնը պնդում է, որ Նիկուլինը 2012-13 թվականներին հաքերային հարձակումներ է իրականացրել Linkedin և Formspring սոցիալական ցանցերի, ինչպես նաև Dropbox կայքի դեմ:

Ռուսաստանը Նիկուլինին մեղադրում է 2009-ին կատարված էլեկտրոնային գողության մեջ, որի ծավալը մոտ երկու հազար դոլար է կազմել:

Չեխիայի արդարադատության նախարարը նաև հաստատել է մամուլում տեղ գտած այն տեղեկությունները, որոնց համաձայն նախագահ Միլոշ Զեմանը իրեն խնդրել է Նիկուլինին հանձնել ռուսական կողմին:

azatutyun.am