ՀՀԿ-ի դարաշրջանը մոտենում է ավարտին

Հայաստանում ընթացող քաղաքական եւ մերձքաղաքական վերջին գործընթացները եւս մեկ անգամ վկայում են, որ հակառակ ՀՀԿ վերնախավի ցանկության եւ երազանքի, նրանց իշխանությունը հավերժ չի կարող լինել:

Ի դեպ, հավերժ կառավարելու մասին երազում էին կոմունիստները: ՀՀՇ-ականները 90-ականների սկզբին հայտարարում էին, թե կառավարելու են մինչեւ 2020 թվականը: Ինչպես ասում են, երազելը վատ չէ, բայց գոյություն ունի իրականություն: Ավելին, տեղի են ունենում գործընթացներ անկախ մեր կամքից եւ ցանկությունից:

Այն, ինչ այսօր տեղի է ունենում ՀՀԿ-ում, վաղուց էր հասունացել, բայց սկսվեց հիմա, քանի որ ոչ միայն մոտենում են խորհրդարանական ընտրությունները, այլ նաեւ ավարտին է մոտենում Սերժ Սարգսյանի պաշտոնավարման ժամկետը: Սերժ Սարգսյանը, ինչպես Արեւմուտքում են ասում, «կաղ բադիկի» կարգավիճակ է ձեռք բերել, եւ դա չէր կարող իր ազդեցությունը չթողնել քաղաքական գործընթացների վրա:

Անշուշտ, միամտություն կլիներ կարծել, թե ՀՀԿ-ն հենց այնպես հանձնվելու է եւ հաճույք ստանալու: Իհարկե՝ ոչ: Հենց այսօր մեր շուրջը կատարվող իրադարձությունները վկայում են, որ ՀՀԿ-ն ցանկանում է հին եղանակներով տիրել իշխանությանը եւ շարունակել կառավարել: Համաձայն ենք, աբսուրդ է, որ բոլոր ոլորտներում տապալված ուժը փորձում է պահել իշխանությունը, բայց սա է իրականությունը:

Ռեյտինգային համակարգը հենց ներդրված է ՀՀԿ-ի իշխանության պահպանման ծրագրի շրջանակներում: ՀՀԿ վերնախավը հույս ունի, որ ռեյտինգային թեկնածուների միջոցով, ինչպես նաեւ վարչական ռեսուրսների եւ շրջիկ ընտրակեղծարար խմբերի գործադրմամբ կապահովի իր հաղթանակը, բայց, ինչպես ասում են, ցանկանալը դեռ քիչ է: Գոյություն ունի օբյեկտիվ իրականություն:

ՀՀԿ-ի վարկանիշը ոչ թե ցածր է, այլ շատ ցածր: Նույնիսկ վարչական եւ նյութական ռեսուրսների գործադրմամբ ՀՀԿ-ն չի կարող 15-20 տոկոսից ավելի ձայն հավաքել: Դժվար է պատկերացնել, որ ՀՀ քաղաքացին իր իսկ ձեռքով ընտրատեղամասում կքվեարկի իր եւ իր երեխաների դեմ: Գյումրիի եւ Վանաձորի ընտրությունները վկայում են, որ ՀՀԿ-ին ծանրագույն փորձություն է սպասվում:

Որքան շուտ ՀՀԿ-ում հաշտվեն այն մտքի հետ, որ Հայաստանն Ուզբեկստան չէ, որքան շուտ հասկանան, որ իրենք չեն կարող հավերժ կառավարել, այնքան լավ բոլորի՝ այդ թվում եւ ՀՀԿ-ականների համար:

Գագիկ Մարտիրոսյան

Այս թեմայով Շարմազանովն այդպես էլ չհասկացավ, թե ինչ էր ասում դեսպանը Դուք փողը տվեք եւ մի կողմ քաշվեք, իսկ մենք ինչ կուզենք, այն էլ կանենք Ինչու ՀՀԿ-ում լարվածություն չկա ՀՀԿ-ի երազած Հայաստանն այսպիսին է (Տեսանյութ) ՀՀԿ-ում սուր պայքար է. նույն պաշտոնին երեք մարդ է հավակնում, այդ թվում Միհրան Պողոսյանը