Բանուգործը թողել են, որ գործ գտնեն․ ԵՊՀ-ում ԲանՈՒԳործ էքսպո է

Ի՞նչ է պետք համալսարանից աշխատաշուկա անցնելու համար՝ մասնագիտական կրթությո՞ւն, աշխատանքային փորձ, լավ CV, թե՞ ճիշտ հմտություններ։ Այս հարցերի շուրջ այսօր Երևանի պետական համալսարանում մեկ հարթակում հանդիպել են ուսանողները, շրջանավարտներն ու գործատուները։ «ԲանՈՒԳործ․ ԵՊՀ էքսպո-2026»-ը այս տարի անցկացվում է նոր ձևաչափով՝ կրթական և աշխատանքային հնարավորություններից բացի ներառելով նաև ուսանողական նախաձեռնությունների ու կարիերայի զարգացման համար նախատեսված նոր հարթակներ։

Էքսպոյի կազմակերպիչների խոսքով՝ միջոցառման նպատակն է ոչ միայն ուսանողին ծանոթացնել հնարավոր գործատուների հետ, այլև ստեղծել այնպիսի միջավայր, որտեղ երիտասարդը կարող է հասկանալ՝ ինչ է իրենից ակնկալում աշխատաշուկան և ինչ քայլեր կարող է անել դեռ համալսարանում։

Այս տարի էքսպոյի նոր բաղադրիչներից մեկը «ԲանՈՒԳործ․ ուսանողական նախաձեռնություններ-2026» ծրագիրն է։ Դրա շրջանակում ԵՊՀ ուսանողները ներկայացնում են իրենց մշակած միջգիտակարգային նախագծերը, իսկ կազմակերպությունները կարող են ընտրել իրենց հետաքրքրող գաղափարները և հանդես գալ որպես գործընկեր, հովանավոր կամ համամենթոր։ Նախագծերը նախապատրաստվել են նաև ամառային դպրոցի և հետագա աշխատանքային հանդիպումների ընթացքում։

Այս տարի մասնակիցների համար առանձին հնարավորություն է նաև ՀՀ արտաքին գործերի և միջազգային առևտրի նախարարության տաղավարը։ Այստեղ այցելուները կարող են ծանոթանալ նախարարության գործունեությանը, դիվանագիտական ծառայության առանձնահատկություններին, ինչպես նաև ԱԳՄԱ դիվանագիտական ակադեմիայում ուսումնառության և նախարարության համակարգում աշխատանքի ընդունվելու հնարավորություններին։

Դիվանագիտական ոլորտով հետաքրքրվողների համար նախատեսված է նաև առցանց հանդիպումների ձևաչափ։ Նախապես գրանցված մասնակիցները հնարավորություն ունեն զրուցելու արտերկրում Հայաստանի դեսպանների հետ, հարցեր ուղղելու մասնագիտական ուղու, դիվանագիտական ծառայության և ոլորտում աշխատանքի առանձնահատկությունների վերաբերյալ։

Էքսպոյի մեկ այլ նոր ուղղություն է «Կարիերայի լաբորատորիա»-ն։ Դրա առաջին փուլում անցկացվում է «Կարիերայի առաջին քայլերը․ գործատուների սպասելիքները» խորագրով պանելային քննարկումը, որտեղ առաջատար ընկերությունների HR մասնագետները խոսում են այն մասին, թե ինչի վրա են ուշադրություն դարձնում սկսնակ մասնագետ ընտրելիս, որքան կարևոր են կրթությունը, փորձն ու CV-ն, և ինչ հմտություններ են թեկնածուներին առանձնացնում մյուսներից։

Բայց գործատուի հետ հանդիպումը ուսանողի համար միայն աշխատանք գտնելու հնարավորություն չէ։ Էքսպոյում մասնակիցներից շատերը փորձում են հասկանալ նաև, թե որքանով են իրենց համալսարանական գիտելիքները համապատասխանում իրական աշխատանքի պահանջներին։ Գործատուների համար էլ նման միջոցառումները հնարավորություն են անմիջականորեն հանդիպելու երիտասարդ մասնագետների հետ։

«ԲանՈՒԳործ․ ԵՊՀ էքսպո-2026»-ը հենց այդ երկու կողմերին մեկ տարածքում հանդիպեցնելու փորձ է։ Այս տարի առաջին անգամ ավելացված «Կարիերայի լաբորատորիան» այդ հանդիպումը տեղափոխում է նաև գործնական հարթություն՝ ուսանողին հնարավորություն տալով ոչ միայն լսել աշխատաշուկայի պահանջների մասին, այլև անմիջական հետադարձ կապ ստանալ իր CV-ի, հմտությունների և կարիերայի առաջին քայլերի վերաբերյալ։

Արմեն Խեչումյան