Արհեստական բանականությանը կասկածում են գիտական չհրապարակված աշխատանքից գրագողության մեջ

OpenAI-ն հայտարարել է, որ իր փորձարարական մոդելը լուծել է Նավիե-Սթոքսի հավասարումը, որի վրա գիտնականներն աշխատում են գրեթե մեկ դար։ Մոտ 10 հազար արհեստական բանականության գործակալներ 88 ժամում գտել են լուծումը, եւս 17 ժամ է պահանջվել այն ստուգելու համար։

Նյու Յորքի համալսարանի պրոֆեսոր Տրիստան Բաքմաստերը պատմել է, որ մոտ մեկ տարի աշխատել է հարակից խնդիրների վրա Anthropic-ի աշխատակից Լեւենտ Ալպեգեի հետ։ Նրանք օգտագործել են Claude եւ Codex (OpenAI-ի ծրագիրը), որոնց ներբեռնել են հետազոտության սեւագրերը, գրում են The Guardian-ն ու и Axiosը։

Բաքմաստերի խոսքով՝ OpenAI-ն սկսել է աշխատել՝ տեղեկանալով նրանց հնարավոր առաջընթացի մասին, եւ ընտրել է նույն բացառիկ մոտեցումը։ Բաքմաստերը նաեւ պնդում է, որ OpenAI-ի հետազոտող Սեբաստյեն Բյուբեքն առաջարկել է Ալպեգեին չընդգրկել հեղինակների թվում՝ Anthropic-ում նրա աշխատանքի պատճառով։ Երբ Բաքմաստերը հրաժարվել է եւ որոշել է հրապարակայնորեն պատմել այդ խոսակցության մասին, նրան, իբր, պատասխանել են. «Ինչո՞ւ ես ուզում կործանել քո կարիերան»։

OpenAI-ն հերքում է, որ իր աշխատակիցները կամ արհեստական բանականության գործակալները մինչեւ հրապարակումը տեսել են մաթեմատիկոսների աշխատանքը։ Միեւնույն ժամանակ, ընկերությունը չի բացառել, որ նրանց կողմից իր արտադրանքների օգտագործման արդյունքում ստացված անանունացված տվյալները կարող էին ազդել մոդելների ուսուցման վրա։ Ինքը՝ Բաքմաստերը, ընդգծում է, որ չգիտի՝ արդյո՞ք իր եւ Ալպեգեի տվյալներն օգտագործվել են, թե՞ ոչ։

«Հազարամյակի խնդիրները» մաթեմատիկական յոթ ամենաբարդ խնդիրներն են, որոնցից յուրաքանչյուրի լուծման համար Քլեյի մաթեմատիկական ինստիտուտը սահմանել է մեկ միլիոն դոլարի մրցանակ։ Ինստիտուտի կայքում Նավիե-Սթոքսի հավասարումը դեռեւս համարվում է չլուծված։ Լուծված միակ խնդիրը մնում է Պուանկարեի վարկածը, որն ապացուցել է Գրիգորի Պերելմանը։