Նոր փոփոխություններ ՌԴ միգրացիոն քաղաքականության մեջ

Ռուսաստանը շարունակում է խստացնել միգրացիոն քաղաքականությունը։ Հերթական փոփոխությունը ուժի մեջ է մտել սեպտեմբերի 1-ից։ Հայաստանի քաղաքացիները տարիներ շարունակ արտագնա աշխատանքի են մեկնել Ռուսաստան, բայց վերջին տարիներին պատկերը սկսել է փոխվել։

Ըստ պաշտոնական տվյալների՝ հիմա ավելի քիչ են մեկնում։ Նրանց մի մասը նախընտրում է թեկուզ քիչ, բայց հենց տեղում վաստակել։ Իրավիճակը բարելավվել է նաև սահմանահատումների առումով։ 2025 թվականի տվյալներով՝ Հայաստան եկած քաղաքացիների թիվը 8․860-ով գերազանցել էր երկրից մեկնած քաղաքացիների թիվը։ Այս տարվա առաջին կեսի տվյալները ևս բարելավվել են։

Տավուշի մարզն ավանդաբար առաջատար է եղել արտագնա աշխատանքի մեկնողների թվով։ Բայց մարզի գյուղերում հազվադեպ կարելի է հանդիպել մարդկանց, որոնք խոսափոխի առաջ կպատմեն իրենց առօրյա հոգսերի մասին։ Խաթուն Գասպարյանիկարծիքով՝ իրավիճակը աստիճանաբար փոխվում է։ Ռուսաստան արտագնա աշխատանքի գնացողների թիվը տարեցտարի նվազում է․

«Դա վաղուց էր, բայց հիմի էդքան չեն գնում, էստեղից էդքան չկան․ հա, կան, ասենք, որ շուտ տեղափոխվել են Ռուսաստան, էնտեղ հիմնական ապրում են, բայց որ գնան, աշխատեն գան, չկան։ Գյուղից էդքան չեն գնում արդեն։ Գյուղում հիմնականում գաջ են քսում, նրանց գործը հիմա շատ է։ Գյուղում 50 հատ տուն են սարքել»։

Հայաստանից արտագնա աշխատանքի մեկնողների թիվը նվազում է, բայց աշխատանք ապահովող երկրների շարքում դեռ ՌԴ–ն է առաջատարը։ Իսկ աշխատանքի մեկնողների թիվը նվազում է, քանի որ Ռուսաստանը պարբերաբար խստացնում է միգրացիոն քաղաքականությունը, նոր պահանջներ է ներկայացնում օտարերկացիներին։

Հերթական խստացումը դրամական փոխանցումներին է վերաբերում։ Խստացվել է բանկային քարտերով, QR կոդերով կատարվող փոխանցումների վերահսկողությունը։ Մասնավորապես՝ եթե փոխանցումը 200 հզր ռուբլուց ավելի է, ապա առաջին անգամ ստացողը կարող է լրացուցիչ ստուգվել։

Կարող են ստուգել հեռախոսահամարը, անձնագրային տվյալները։ Փոփոխությունների դեպքում կարող են կիրառվել սահմանափակումներ։ Բացի այդ՝ ՌԴ հարկային ծառայությունը հոկտեմբերից աշխատավարձերի և եկամուտների վերաբերյալ տեղեկություններ կտրամադրի ոստիկանությանը։ Սա նշանակում է, որ օտարերկրյա քաղաքացիների հայտարարած կամ ստացած եկամուտների տվյալները ավելի հեշտ հասանելի կդառնան միգրացիոն վերահսկողության մարմիններին։ Կարևոր է պաշտոնապես ձևակերպել աշխատանքը, պահպանել եկամուտները հաստատող փաստաթղթերը, ուշադրություն դարձնել ընտանիքի անդամների հաշվարկին, ստուգել՝ արդյոք  եկամուտը համապատասխանում է տվյալ տարածաշրջանում սահմանված պահանջներին։ Խստացումները փոխել են արտագնա աշխատանքի մեկնողների վերաբերմունքը, երբեմն նաև նախասիրությունները․

«Աշխատանք կա, աշխատում ենք, գյուղում շինարարություն են անում։ Աշխատում են նաև մարզում։ Եթե մարդը ցանկություն ունի ինչ–որ բան անելու, անում է»։

Վիճակագրությունը սահմանահատումների առումով դրական է։ ՆԳՆ միգրացիայի և քաղաքացիության ծառայության պետ Նելլի Դավթյանն ասում է, որ 2025–ին Հայաստան եկողների թիվը 8 հազարով ավել է, քան մեկնողներինը։ Առաջին կիսամյակն ամփոփելիս այլ միտում են նկատել․ «1-ին կիսամյակում ևս ՀՀ  քաղաքացիների սահմանահատումների տարբերությունը դրական է։ Սա կրկին բացառիկ ցուցանիշ է այն իմաստով, որ սովորաբար ցուցանիշը բարելավվում է տարվա 2-րդ կեսին` հիմնականում պայմանավորված մեր աշխատանքային միգրացիայի ավանդական հոսքերով, որոնք գարնան սեզոնին որպես ելք են արձանագրվում մեր թվերում, և աշնան սեզոնին՝ որպես մուտք։ 871 հզր 409 մուտք, 870.062 ելք»։

Ընդհանուր առմամբ, պատասխանատուներն ու մասնագետները կարծում են, որ դրական սալդոն կպահպանվի նաև այս տարի։

armradio.am