Լիոնել Մեսսին պաշտոնապես հայտարարեց Արգենտինայի ազգային հավաքականում իր ելույթներն ավարտելու մասին

39-ամյա լեգենդար հարձակվող Լիոնել Մեսսին օգոստոսի 31-ին պաշտոնապես հայտարարեց Արգենտինայի ազգային հավաքականում իր փառահեղ ելույթներն ավարտելու մասին։

Այս պատմական որոշմանն արձագանքել է նրա հարազատ ակումբը՝ կատալոնական «Բարսելոնան»՝ հուզիչ մեկնաբանություն թողնելով ֆուտբոլիստի սոցցանցային գրառման տակ։ «Դու տվեցիր քո բոլոր ուժերը, խաղացիր մինչև վերջին շունչդ։ Արգենտինան ու ողջ Բարսելոնան հպարտանում են այն մեծագույն ժառանգությամբ, որը դու թողնում ես»,- նշված է կատալոնական ակումբի մամուլի ծառայության տարածած հաղորդագրության մեջ։

Հիշեցնենք, որ արգենտինացի հանճարի վերջին հանդիպումն ազգային թիմի մարզաշապիկով դարձավ 2026 թվականի Աշխարհի առաջնության եզրափակիչը։ Լարված դիմակայության լրացուցիչ ժամանակում արգենտինացիները նվազագույն հաշվով (0:1) զիջեցին Իսպանիայի ընտրանուն։

«Ալբիսելեստեի» կազմում անցկացրած տարիների ընթացքում Մեսսին դարձել է բացարձակ ռեկորդակիր՝ մասնակցելով 207 հանդիպման և դառնալով 125 գոլի հեղինակ։ Նա ազգային թիմի հետ նվաճել է միջազգային ասպարեզի բոլոր հնարավոր գլխավոր տիտղոսները՝ դառնալով 2022թ․ Աշխարհի չեմպիոն, 2021 և 2024թթ․ Ամերիկայի գավաթակիր, 2022թ․ Ֆինալիսիմայի հաղթող և 2008թ․ Օլիմպիական խաղերի չեմպիոն։

Մեսսին «Բարսելոնայի» ակադեմիայի գլխավոր հպարտությունն է, ով առաջին թիմի գույները պաշտպանել է 2003-ից մինչև 2021 թվականը։ «Բլաուգրանայի» հետ անցկացրած ոսկե տարիներին նա 10 անգամ հռչակվել է Իսպանիայի չեմպիոն, 4 անգամ բարձրացրել Չեմպիոնների լիգայի գավաթը, 7 անգամ հաղթել Իսպանիայի գավաթի խաղարկությունում, ինչպես նաև 3-ական անգամ նվաճել ՈւԵՖԱ-ի Սուպերգավաթն ու Աշխարհի ակումբային առաջնության տիտղոսը։