Հունական լցանավը հարձակման է ենթարկվել Սեւ ծովում. Bloomberg

Հունական Skiros լցանավը Սեւ ծովում հարձակման է ենթարկվել, հաղորդում է Bloomberg գործակալությունը` հղում անելով իր աղբյուրներին։ Ըստ գործակալությանբ՝ լցանավը հարձակման է ենթարկվել կիրակի՝ օգոստոսի 16-ին, Նովոռոսիյսկի մերձակայքում գտնվող Կասպյան խողովակաշարային կոնսորցիումի` ԿԽԿ-ի տերմինալում ռուսական նավթ բեռնելուց հետո։

Ավելի վաղ Financial Times-ը հայտնել էր, որ հուլիսի վերջին ԱՄՆ փոխնախագահ Ջեյ Դի Վենսը Ուկրաինայի նախագահ Վոլոդիմիր Զելենսկուն խնդրել էր դադարեցնել հարվածները ԿԽԿ-ի ենթակառուցվածքներին եւ Նովոռոսիյսկի նավահանգիստ մտնող լցանավերին։

Այդ ժամանակ Կիեւը համաձայնել էր չհարվածել  ԿԽԿ-ի ենթակառուցվածքներին եւ Ռուսաստանին չպատկանող նավերին, եթե դրանք չեն գտնվում ուկրաինական պատժամիջոցների տակ եւ չեն տեղափոխում ռուսական նավթ կամ ռուսական այլ բեռներ։

ԿԽԿ-ն Ղազախստանից նավթի մատակարարման հիմնական երթուղին է, իսկ կոնսորցիումում բաժնեմասեր ունեն նաեւ ամերիկյան Chevron եւ ExxonMobil ընկերությունները։

Նովոռոսիյսկում գտնվող ԿԽԿ-ի ծովային տերմինալը եւ այդ տարածքում գտնվող լցանավերը պարբերաբար ենթարկվում են ուկրաինական հարձակումների։ Այդ պատճառով Ղազախստանը ստիպված է կրճատել նավթի արդյունահանումը։