Ալեն Սիմոնյանն առաջին ԱԺ նախագահն է, ով պաշտոնավարել է իր գործունեության ամբողջ ժամկետը

ԱԺ «Քաղաքացիական պայմանագիր» խմբակցության անունից իր ելույթում խմբակցության ղեկավար Հայկ Կոնջորյանը նկատեց՝ ակնհայտ է, որ իր ելույթը լինելու է վերջինը այս գումարման խորհրդարանում, ու պատահել է այնպես, որ Ազգային ժողովի 8-րդ գումարման իր առաջին ելույթը և իր վերջին ելույթը նույն թեմայի մասին են:

«Իմ առաջին ելույթով ես այս ամբիոնից ներկայացրել եմ Ազգային ժողովի նախագահի մեր թեկնածու Ալեն Սիմոնյանին, և իմ վերջին ելույթով այս ամբիոնից ես ուզում եմ շնորհակալություն հայտնել ևս մեկ անգամ ԱԺ նախագահ պարոն Սիմոնյանին իր կատարած շատ կարևոր և վճռական աշխատանքի համար և ես ուզում եմ նաև արձանագրել, որ մեր թեկնածուն և մեր առաջադրած թեկնածությունն իսկապես հաջողված են և հաջողված էին նաև այն փաստի բերումով, որ պարոն Սիմոնյանը մինչ այս պահը առաջին ԱԺ նախագահն է, որը պաշտոնավարել է իր գործունեության ամբողջական ժամկետով: Ես ուզում եմ ևս մեկ անգամ շնորհավորել և շնորհակալություն հայտնել պարոն Սիմոնյանին այդ աշխատանքի կապակցությամբ»,- ասաց Կոնջորյանը՝ հիշեցնելով, թե ինչ դժվարին ճանապարհի միջով են անցել:

Նրա խոսքով՝ ԱԺ ութերորդ գումարումը ձևավորվեց հետպատերազմյան շրջանում՝ արտահերթ ընտրությունների արդյունքում, որին հաջորդել են տուրբուլենտ ժամանակներ՝ 2022-ի սեպտեմբերյան իրադարձությունները, որոնք պարբերաբար զուգորդվել են ներքաղաքական տարատեսակ վայրիվերումներով, 2023-ի սեպտեմբերյան իրադարձությունները, սահմանազատման գործընթացը, տարբեր տեսակի «փրկության շարժումներ»:

«Այս գործում Ազգային ժողովի և ԱԺ նախագահի դերակատարումը անուրանալի է»,- հայտարարեց խմբակցության ղեկավարը՝ շնորհակալություն հայտնելով ՔՊ խմբակցությանը:

«Խմբակցությունը ևս իր արժանի տեղում պահել է ՀՀ-ի գլխավոր միջնաբերդը և պաշտպանել է ՀՀ ինքնիշխանությունը և պետականությունը: Շնորհակալություն եմ հայտնում ձեզ և սիրում եմ բոլորիդ, սիրելի ընկերներ»,- ասաց Կոնջորյանը: