ՌԴ-ն ցանկանում է 50 մլն դոլարով 100,000 հայի ուղարկել ՀՀ` Փաշինյանի դեմ քվեարկելու. Reuters

Reuters լրատվական գործակալությունը ծավալուն հոդված է հրապարակել, որում նշված է, թե ինչպես է «Ռուսաստանն ակտիվացրել գաղտնի ջանքերը՝ խափանելու հաջորդ ամիս Հայաստանի վարչապետ Նիկոլ Փաշինյանի վերընտրությունը՝ վախենալով, որ նրա հաղթանակը կարող է ամրապնդել նախկին Խորհրդային Հանրապետության կողմնորոշումը դեպի արևմուտք»:

Այս մասին հայտարարում են արևմտյան հետախուզական և կառավարական պաշտոնյաները, գրում է Reuters-ը։ Համաձայն արևմտյան հետախուզության հինգ աշխատակցի հետ հարցազրույցների և փաստաթղթերի, որոնց ծանոթ է Reuters գործակալությունը՝ հունիսի 7-ի ընտրությանն ընդառաջ՝ Մոսկվայի ծրագրերը ներառում են ապատեղեկատվական արշավներ՝ հօգուտ ռուսամետ թեկնածուների և տասնյակ հազարավոր ռուսաստանաբնակ հայերի տեղափոխման «հանդուգն սխեմա՝ քվեարկության արդյունքների վրա ազդելու համար»:

Գործակալությունը հիշեցնում է, որ 3 միլիոն բնակչություն ունեցող և դեպի ծով ելք չունեցող Հայաստանը՝ սառը պատերազմից ի վեր հիմնականում մնացել է Մոսկվայի ազդեցության ուղեծրում: Սակայն, հանրապետության վարչապետ Նիկոլ Փաշինյանը, որը հարցումների համաձայն՝ առաջատարն է առաջիկա ընտրությունում, մտերմացել է Եվրոպայի և ՆԱՏՕ-ի հետ՝ դառնալով ԱՄՆ նախագահ Դոնալդ Թրամփի դաշնակիցը, որը չորեքշաբթի սատարեց Փաշինյանի վերընտրությանը: «ԱՄՆ պետքարտուղար Մարկո Ռուբիոն էլ այս շաբաթ այցելել է Երևան և ստորագրել օգտակար հանքանյութերի և ԹՐԻՓՓ-ի մասին համաձայնագիրը»: Հայաստանի տարածքով առաջարկվող տրանսպորտային միջանցքը, ըստ լրատվական գործակալության, կարող է էլ ավելի թուլացնել ռուսական ազդեցությունը տարածաշրջանում:

Հայաստանը Ռուսաստանի գլխավորած տնտեսական միության անդամ է, 2024 թվականին դադարեցրել է իր մասնակցությունը Հավաքական անվտանգության պայմանագրի կազմակերպությունում, այս ամիս Հայաստանում հյուրընկալել է ՆԱՏՕ-ի գլխավոր քարտուղարին՝ Եվրոպական քաղաքական համայնքի գագաթնաժողովի շրջանակներում:  

«Ռուսաստանի նախագահ Վլադիմիր Պուտինը չի թաքցնում իր դժգոհությունը Փաշինյանի կուրսի փոփոխությունից։ Վերջին օրերին Մոսկվան զգուշացնում էր, որ Հայաստանը կարող է զրկվել բնական գազի էժան մատակարարումներից, սահմանափակել է հայկական արտադրանքի, այդ թվում ՝ մրգի, բանջարեղենի, ծաղիկների և կոնյակի ներմուծումը»,-նշում է աղբյուրը:

Ըստ պարբերականի՝ արևմտյան երեք պաշտոնյայի խոսքով՝ Մոսկվայի նախընտրելի թեկնածուն Սամվել Կարապետյանն է ՝ միլիարդատեր, որը դատարանի առաջ է կանգնած Հայաստանի կառավարությունը տապալելու կոչեր անելու մեղադրանքով: Ռոյթերսը նշում է, որ Սամվել Կարապետյանը հերքում է Ռուսաստանից աջակցություն ստանալու վերաբերյալ մեղադրանքները։

«Եվրոպան վաղուց է Ռուսաստանին մեղադրում ընտրություններին միջամտելու համար, վերջերս՝ Մոլդովայում ու Հունգարիայում: Ռուսաստանն էլ պնդում է, որ ԵՄ-ն և ԱՄՆ-ն են միջամտում իր սահմանների մոտ գտնվող երկրների գործերին, որպեսզի նրանց ներգրավեն Արևմուտքի ազդեցության տիրույթում:

Ռուսաստանի ԱԳՆ-ը, ի պատասխան Ռոյթերսի հարցմանը, հայտնել է, որ Հայաստանի ներքին գործերին Ռուսաստանի միջամտության մասին պնդումները «լրտեսական մոլուցք» են: ՀՀ կառավարության կապի վարչությունը հրաժարվել է մեկնաբանել այս հոդվածում ներկայացված կոնկրետ մեղադրանքները, սակայն նախանշել է ապատեղեկատվության դեմ պայքարի ոււ ազատ, արդար և թափանցիկ ընտրությունների ապահովման ուղղությամբ ձեռնարկվող միջոցառումները»,- նշված է լրատվական գործակալության հրապարակման մեջ:

Reuters-ի տեղեկություններով՝ հոկտեմբերին Կրեմլը հիմնադրել է ռազմավարական համագործակցության և գործընկերության վարչությունը, որն, ըստ չորս աղբյուրի, վերահսկում է Հայաստանում ազդեցության գործողությունները:

Ըստ հինգ աղբյուրի՝ վերջին ամիսներին ռուս պաշտոնյաները քննարկել են ռուսաստանաբնակ հայերին Փաշինյանի ընդդիմախոսների օգտին քվեարկելու համար Հայաստան ուղարկելու հնարավորությունը: Հայերը մեծ սփյուռք ունեն, ներառյալ Ռուսաստանը, որի թիվը, ըստ որոշ գնահատականների, գերազանցում է 2 միլիոնը: ՀՀ քաղաքացիները չեն կարող ընտրություններին քվեարկել արտերկրում։

Ըստ երեք աղբյուրի՝ Ռուսաստանի իշխանությունները հաշվարկել են, որ 100 հազար ընտրողի տեղափոխումը կարժենա մոտ 50 միլիոն դոլար: Մայիսի կեսերին Կրեմլը քվոտաներ է սահմանել, թե որ հայերին որ տարածաշրջան է պետք ուղարկել, իսկ ադմինիստրատորներին խնդրել է հաշվետվություն ներկայացնել նախապատրաստական աշխատանքների վերաբերյալ։

«Այս ամսվա սկզբին անցկացված հարցումը ցույց է տվել, որ Փաշինյանի «Քաղաքացիական պայմանագիր» կուսակցությունը կզբաղեցնի առաջին տեղը՝ հավաքելով ձայների մոտ 30%-ը: Կարապետյանի «Ուժեղ Հայաստան» կուսակցությունը զգալիորեն հետ է մնացել խիստ մրցակցության պայմաններում՝ հավաքելով ձայների մոտ 6 տոկոս:

Ռուս պաշտոնյաներն ակտիվացրել են գոյություն ունեցող առցանց ապատեղեկատվական արշավները, որոնք ուղղված են Փաշինյանի կառավարության վարկաբեկմանը»,-գրում է լրատվականը: Եվրոպացի պաշտոնյաներից մեկը հայտարարել է, որ այդ արշավներում օգտագործվում է Կրեմլի հետ կապված բոտերի ցանցը՝ հայտնի է «Փոթորիկ 1516»-ը, որը դեր է խաղացել ԱՄՆ-ի վերջին ընտրություններին միջամտելու փորձերում: Երեք աղբյուր ասել է, որ Կրեմլը ներգրավել է ռուսական քաղաքական խորհրդատվական ընկերություններին և վերլուծական կենտրոններին, ներառյալ Սոցիալական դիզայնի գործակալությունը (SDA), որը գտնվում է Եվրամիության և Մեծ Բրիտանիայի պատժամիջոցների տակ՝ Ուկրաինային աջակցությունը խաթարելու համար ապատեղեկատվություն տարածելու համար:

Reuters գործակալությունը ուսումնասիրել է հինգ ռուսալեզու փաստաթղթեր, որոնք, ըստ աղբյուրների, կազմել է SDA-ն: Փաստաթղթերից մեկում առաջարկվում էր Ռուսաստանի հայկական սփյուռքի համար ստեղծել «Երևան1» անվանումով լրատվամիջոց՝ Փաշինյանի նկատմամբ «բացասական վերաբերմունքը» տարածելու նպատակով, հիմնվելով՝ «Հայաստանը կարող է բարգավաճել միայն Ռուսաստանի հետ սերտ դաշինքով և նրա պաշտպանության ներքո» գաղափարի վրա։