«Արարատ ցեմենտ»-ի հնարավոր պետականացումից մինչև ռուսական «մութ» կապեր

Հայաստանի ներքաղաքական դաշտում քննարկումներ են ակտիվացել «Բարգավաճ Հայաստան» կուսակցության առաջնորդ, գործարար Գագիկ Ծառուկյանի շուրջ։ Մի կողմից՝ տեղեկություններ են շրջանառվում նրան պատկանող «Արարատ ցեմենտ» գործարանի հնարավոր պետականացման մասին, մյուս կողմից՝ միջազգային հետաքննական մամուլում հրապարակումներ են հայտնվել, որոնցում Ծառուկյանի անունը կապվում է Կրեմլի ազդեցության ցանցերի հետ։ ԲՀԿ-ում այս տեղեկատվական հոսքերը անակնկալ ու անսպասելի չեն համարում և դրանք դիտարկում են նախընտրական գործընթացների շրջանակում։

Մինչ լրատվամիջոցներում ամենատարբեր քաղաքական շեշտադրումներով շրջանառվում ու թափ էին առնում աղմկահարույց տեղեկությունները «Արարատ ցեմենտ» գործարանի հնարավոր պետականացման մասին, հաղորդագրություն տարածեց ՀՀ դատախազությունը։  Ըստ այդմ՝ ուսումնասիրվել է 2002 թվականին «Արարատցեմենտ» ընկերության մասնավորեցման գործընթացը։

Ձեռք են բերվել առերևույթ հանցագործության հատկանիշներ պարունակող փաստեր, ինչի հիման վրա մայիսի 7-ին նախաձեռնվել է քրեական վարույթ՝ պաշտոնեական լիազորությունների չարաշահման և առանձնապես խոշոր չափերով փողերի լվացման հատկանիշներով։ Դատախազությունը նշում է, որ «Արարատցեմենտ»-ի պետական բաժնետոմսերը 2002-ին ուղղակի վաճառքով մասնավորեցվել են «Ռոբերտո» բելգիական կազմակերպությանը 200 հազար դոլարով։ Այդ ընկերության հիմնադիրները եղել են ՀՀ քաղաքացիներ:

«Ռոբերտո» ընկերության կառավարիչ է նշանակվել Վահագն Գուլոյանը, ով ՀՀ Ազգային ժողովի նախկին պատգամավոր Գագիկ Ծառուկյանի խնամու՝ նախկին պատգամավոր Մուրադ Գուլոյանի կրտսեր եղբայրն է, Ծառուկյանի փեսայի՝ Կոտայքի նախկին մարզպետ Կարապետ Գուլոյանի հորեղբայրը:  Որոշ ժամանակ անց դրա կառավարիչ է նշանակվել Գագիկ Ծառուկյանը։ Դատախազությունը շատ մանրամասներ է հայտնել այս մասին, նաև տեղեկացրել, որ կառավարությանը գրությամբ առաջարկել է քննարկել ընկերությունում ժամանակավոր կառավարիչ նշանակելու նպատակահարմարությունը։ Մամուլը սրանից ենթադրել է, թե «Արարատցեմենտ»-ում կարող է նշանակվել կառավարիչ այնպիսի մեխանիզմով, ինչպիսին կիրառվել էր «Հայաստանի էլեկտրական ցանցեր»-ում։

ԲՀԿ ղեկավար Գագիկ Ծառուկյանը Սյունիքում նախընտրական քարոզարշավի ընթացքում, մեկնաբանելով «Արարատ ցեմենտի»-ն վերաբերող տեղեկությունները նշել է, որ իրեն նախկինում զգուշացրել են հնարավոր նման գործողությունների մասին.

«Դրա մասին ինձ դիմել էին, ասել էին։ Ես ասում եմ՝ կյանքում ես չեմ կարող իմ հայրենիքը փոխեմ ունեցվածքի հետ։ Օրինական կա, առել ենք, ամեն ինչն էլ իր տեղում  է։ Ինչի՞  25 տարի անցել է, նոր են հիշել։ Ինչի՞ մասին է խոսքը։ Հարկերն էլ ենք տալիս, ամեն ինչը տեղը տեղին է։ Այնպես որ, ամեն ինչ ապացուցում է ժամանակը»։ 

Նախկին իշխանությունները «Արարատ ցեմենտ» գործարանի մասնավորեցումը բացատրում էին կանգնած արտադրության վերագործարկման ու ներդրումային ծրագրերով։  Հետագայում նախկին իշխանությունների օրոք կառավարության և  Ծառուկյանին պատկանող «Մուլտի Գրուպ» կոնցեռնի միջև եղել են աշխատանքային ու հարկային քննարկումներ,գործարանի շուրջ հնչել են մտահոգություններ, սակայն գործընթացը չի վերածվել  ազգայնացման։ Գործարանի պետականացման շուրջ վերջին խոսակցությունները ո՛չ նորություն են, ո՛չ էլ  անսպասելի՝ «Ռադիոլուրի» հետ զրույցում ասաց Գագիկ Ծառուկյանի մամուլի խոսնակ Իվետա Տոնոյանը՝ սրա  հիմքում կոնկրետ քաղաքական դրդապատճառներ տեսնելով։

 «Որովհետև  կոնկրետ  ռազմավարական նշանակություն ունի «Արարատ ցեմենտ» գործարանի գործունեությունը Հայաստանի Հանրապետության տնտեսական կյանքում։ Տնտեսական ուղղվածություններից, կարևորագույններից մեկն է՝ 1000-ավոր աշխատատեղեր…, և նաև սուվերենության, այսպես ասած, գործառույթներից մեկն է։ Այստեղ մենք բազմաթիվ՝ թե՛ իրավական, թե՛ բարոյական, խնդիրներ ենք տեսնում, նաև հետամուտ ենք լինելու  այս գործելաոճին, սակայն որևէ սպառնալիք, որևէ կերպ չի անդրադառնալու մեր քաղաքական գծի փոփոխության վրա։ Մենք շարունակելու ենք հանդես գալ նույն գործելաոճով, նույն կառուցողականության դաշտում։ Մեր քաղաքականության մեջ որևէ բան չի փոխվելու»։

Նախօրեին միջազգային հետաքննական The Insider պարբերականն աղմկահարույց հրապարակմամբ անդրադարձել է Հայաստանում Ռուսաստանի հատուկ ծառայությունների ազդեցության մեխանիզմներին և այդ համատեքստում հիշատակել նաև Գագիկ Ծառուկյանի անունը։ Պարբերականը գրել է, որ ընդդիմադիր գործիչ և «Բարգավաճ Հայաստան» կուսակցության առաջնորդ Գագիկ Ծառուկյանը, որը մասնակցում է հունիսի 7-ի խորհրդարանական ընտրություններին, դիտարկվում է Մոսկվայի հետ կապեր ունեցող դերակատար։ Մեջբերում․

 «ՌԴ նախագահի աշխատակազմի արխիվների արտահոսքում պահպանվել են Ծառուկյանի անձնագրի պատճենն ու 2017 թվականի ընտրարշավի ֆինանսական նախահաշիվները, ինչը փաստում է, որ Կրեմլի հատուկ հիմնադրամներից նախկինում խոշոր գումարներ են հատկացվել «Ծառուկյան» դաշինքին, թեև այդ միջոցների մի մասը, ամենայն հավանականությամբ, յուրացվել է հենց մոսկովյան պաշտոնյաների կողմից»։  

Հրապարակման մեջ նաև ձևակերպում կա, թե Ծառուկյանը տարիներ շարունակ դիտարկվել է  Ռուսաստանի շահերին մոտ կանգնած քաղաքական գործիչ։ ԲՀԿ-ում այս տեղեկատվական հոսքերը նույնպես կապում են բացառապես նախընտրական գործընթացների հետ։ Սյունիքում Գագիկ Ծառուկյանը հայտարարել է.

«Միայն մարդկանց վրա ցեխ շպրտեն, շանտաժ անեն։ Ժողովուրդը հոգնել է էդ հայհոյանքից, ցեխ շպրտելուց. ժողովրդին չի հետաքրքրում։ Ժողովրդին հետաքրքրում է իր տունը, իր էրեխեն, իրա վարկերը փակվի, իր էրեխու սնունդը հասցնի, իր ծնողին կարողանա պահի։ Ժողովուրդը պետք է իրա վրա զգա։ Մեղավորը դուք եք, ժողովուրդ, դուք որոշում կայացրեք, 50 %-ը չի մասնակցում, ինչի՞ համար չեք մասնակցում»։

«The Insider»-ի հրապարակած տեղեկություններին անդրադառնալով՝  Գագիկ Ծառուկյանի մամուլի խոսնակ Իվետա Տոնոյանը դրան անգամ զավեշտալի չի համարում։ Զավեշտալին այն է, ասում է, որ հղում է արվում անգամ դեղին մամուլ չհամարվող պարբերականի հրապարակումներին։ Ստահոդ լուր է և մանիպուլիացիա՝ շեշտում է Տոնոյանը։   

«Բոլորը շատ լավ հասկանում են, թե այս գործընթացներն ինչպես են տեղի ունենում պատվերով համերգի, այսպես ասած, տրամաբանության շրջանակներում։ Ողբերգականը այն է, որ հղում  է արվում  ինչ-որ անհայտ ծագում ունեցող լրատվամիջոցի, արտերկրում ինչ-որ զրոյական  հեղինակություն և վարկանիշ ունեցող լրատվամիջոցի»։

Նման տեղեկատվական տեխնոլոգիաների և դրանց սկզբունքներին ԲՀԿ-ում նույնպես շատ լավ տիրապետում են՝ ասում է Իվետա Տոնոյանը, հավելում՝ դա շատ ցածր նշաձող է ցանկացած քաղաքական գործչի ու քաղաքական ուժի համար։ Իրենք երբեք նախահարձակ չեն լինելու և պահելու են բարեկրթության բոլոր նորմերը։

Վերադառնալով իրավական գործընթացներին․ կառավարությունը դատախազությունից գրություն է ստացել, որ Արարատի ցեմենտի գործարանը ենթակա է պետականացման և առաջարկելով, որ կառավարությունը գործարանում ժամանակավոր կառավարիչ նշանակի։ 

armradio.am