Հայկական տեխնոլոգիական ընկերությունների ներուժն ու հայրենական ռազմարդյունաբերության նորագույն մշակումները կներկայացվեն մեկ հարթակում։ Մարզահամերգային համալիրում հունիսի 3-ից 4-ը կանցկացվի Rise Powered by Silicon Mountains տեխնոլոգիական ցուցահանդես–ֆորումը։ Դրանում  կներկայացվեն ինժեներական և պաշտպանական այնպիսի լուծումներ, որոնց մի մասը դեռ փորձարկման փուլում է, մի մասն արդեն համալրել է զինանոցը։ ՀՀ բարձր տեխնոլոգիական արդյունաբերության նախարարության աջակցությամբ անցկացվող միջոցառումը նպատակ ունի դառնալու ոլորտի առաջատարների մշտական հաբ։

Դրոններ, կապի միջոցներ, զրահապատ մեքենաներ ու պաշտպանական համակարգեր․ հունիսի 3-ից 4-ը Երևանում անցկացվելիք Rise Powered by Siliconn Mountains տեխնոլոգիական ցուցահանդեսում կներկայացվեն հայկական ինժեներական մտքի այն բոլոր գաղափարները, որոնք մշակվել և դարձել են վերջնական արտադրանք։

Հայաստանի կառավարությունը 60 մլն դրամ է տրամադրել Տեղեկատվական և հաղորդակցության տեխնոլոգիաների գործատուների միությանը միջոցառումը կազմակերպելու և անցկացնելու համար։

Ցուցահանդեսին նախորդելու է Մայիսի 28-ի զորահանդեսը։ Երկու իրադարձություններն էլ հայկական ռազմարդունաբերական արատադրանքը ներկայացնելու հնարավորություն են՝ ասում է ԲՏԱ նախարար Մխիթար Հայրապետյանը․

«Զորահանդեսում ցուցադրվելու են և միջազգային տարբեր գործընկերներից ռազմատեխնիկական գործակցության արդյունքում ՀՀ զինված ուժերում առկա տեխնիկան և հայրենական արտադրության այն տեխնիկան, որոնցով զինված ուժերը համալրված է։ Rise-ի շրջանակում նաև ցուցադրվելու են այնպիսի զինատեսակներ, որոնցով դեռ ԶՈւ-ն համալրված չէ։ Կցուցադրվեն տարատեսակն պրոդուկտներ,  ինժեներական լուծումներ, որոնք դիցուք փորձարկման, մշակման վերջին փուլում են կամ փորձարկման ընթացքում են։ Այս իմաստով որոշակի բազմազանություն միայն Rise-ն ապահովելու է»։

Անդրադառնալով Հայաստանից միլիոնավոր դոլարների հասնող հայկական արտադրության զենքի արտահանման մասին իր հայտարարությանը՝ նախարարն ասում է, որ առայժմ ընկերությունների անունները, ընդհանուր արժեքն ու արտահանման երկրները չի հրապարակի, քանի որ նման տվյալներ հրապարակելու համար կողմերը դեռ վերջնական համաձայնություն չունեն։

«Ռադիոլուր»-ի հարցին ևս, թե կոնկրետ ինչ զինատեսակներ են ցուցադրվելու, նախարարը պատասխանում է առանց փակագծեր բացելու, պարզապես առաջարկելով մասնակցել ցուցահանդեսին։

2019–ից Silicon Mountains տեխնոլոգիական հարթակը միավորում է ոլորտի առաջատարներին՝ ասում է ՏՀՏ գործատուների միության գործադիր տնօրենը։ Էդուարդ Մուսայելյանի խոսքով՝ այն փոքր ձևաչափի գագաթնաժողովից վերածվել է տարեկան 1․000-ից ավելի այցելու ունեցող խոշոր միջոցառման։ Այս տարի ցուցադրությունը, ըստ կազմակերպիչների, բացառիկ կլինի․

«Rise-ը ոչ միայն ռազմաարդյունաբերությանը կամ պաշտպանական արդյունաբերությանն է վերաբերում, այլ վերաբերում է ճարտարագիտական, նորարարությունների և կիբերանվտանգության ոլորտում մեր վերջին ձեռքբերումներին։ Այս ամենինչը համակցելով մենք ուզեցել ենք նաև ցույց տանք ֆիզիկապես, թե ինչերի է ունակ հայկական միտքը»։

ՏՀՏ գործատուների միության գործադիր տնօրենի խոսքով՝ ցուցադրության մասնակիցները հնարավորություն կունենան տեսնելու և, այսպես ասենք, «շոշափելու» հայ ինժեներական մտքի արդյունքները։

Ցուցադրությանը զուգահեռ անցկացվելու է ֆորում՝ պանելային երեք քննարկումներով՝ կիբեռանվտանգություն, պաշտպանական արդյունաբերություն և ինժեներական լուծումներ թեմաներով։

«40–ից ավելի ընկերություն է մասնակցելու, որոնց մի մասն այդ պաշտպանական համակարգերն են ներկայացնելու, մի մասը նաև հետաքրքիր մոտեցում ունեն, որ ներգրավենք երիտասարդներին և փորձելու ենք հենց տեղում հունիսի 3-ին և 4-ին իրականացնենք սիմուլացիոն որոշակի գործողություններ, դասընթացներ, որ երիտասարդները գան տեղում միանգամից, օրինակ փորձեն դրոն քշել։ Այսինքն` անօդաչու սարքեր կառավարեն, դասընթացների մասնակցեն, խաղարկությունների մասնակցեն, որ հետագայում ավելի կատարելագործվեն»։

ՏՀՏ գործատուների միության տնօրենի փոխանցմամբ՝ միջոցառման շրջանակում գործելու է հատուկ՝ «բիզնեսը բիզնեսի համար» գոտի՝ նախատեսված գործարար հանդիպումների համար։ Կազմակերպիչների նպատակն է Rise ցուցահանեսը դարձնել ոչ թե տարին մեկ անգամ  անցկացվող միջոցառում, այլ շարունակական  գործակցության հարթակ, որտեղ գործնական  կապեր կհաստատվեն ու մասշտաբային նախագծեր կծնվեն։

armradio.am