Համակարգչային խաղերով չափից ավելի տարվելը կարող է դուրս մղել օգտակար սովորությունները՝ լիարժեք սնունդը, քունը և ֆիզիկական ակտիվությունը

Ավստրալիայի Քերթինի համալսարանի հետազոտողները պարզել են, որ շաբաթական 10 ժամից ավելի կանոնավոր խաղային սեանսները զգալիորեն վատթարացնում են սննդի որակը, քունը և ազդում երիտասարդների մարմնի զանգվածի վրա: Արդյունքները հրապարակվել են Nutrition ամսագրում: Փորձին մասնակցել է ավստրալիական հինգ համալսարանների 317 ուսանող: Միջին տարիքը 20 տարեկանն է: Մասնակիցներին բաժանել են երեք խմբի՝ կախված խաղերին հատկացրած ժամանակից.

Քիչ խաղացողներ - շաբաթական մինչև 5 ժամ: Չափավոր խաղացողներ - 5-ից 10 ժամ: Մոլի գեյմերներ - ավելի քան 10 ժամ:

Գիտնականները գնահատել են սննդի որակը (հատուկ սանդղակով), քնի տևողությունն ու որակը, մարմնի զանգվածի ինդեքսը (ՄԶԻ) և ֆիզիկական ակտիվության մակարդակը: Ցածր և չափավոր խաղային ակտիվություն ունեցող ուսանողների առողջական ցուցանիշները գրեթե նույնն են եղել: Այս խմբերում միջին ՄԶԻ-ն կազմել է 22,2–22,8 կգ/մ², ինչը նորմայի սահմաններում է:

Բոլորովին այլ պատկեր է նկատվել նրանց մոտ, ովքեր շաբաթական 10 ժամից ավելի են խաղացել: Նրանց միջին ՄԶԻ-ն հասել է 26,3 կգ/մ²-ի, ինչն արդեն համապատասխանում է ավելորդ քաշի գոտուն: Սննդի որակը էապես վատացել է, իսկ քունը դարձել է ավելի մակերեսային ու կարճ:

Շաբաթական յուրաքանչյուր հավելյալ խաղային ժամը կապված է եղել սննդի որակի անկման հետ, նույնիսկ եթե մարդը պահպանել է ֆիզիկական ակտիվությունը և ուժեղ սթրես չի ունեցել: «Մեր տվյալները ցույց են տալիս, որ խաղերով չափից ավելի տարվելը կարող է դուրս մղել օգտակար սովորությունները, ինչպիսիք են լիարժեք սնունդը, քունը և ֆիզիկական ակտիվությունը»,- նշել է պրոֆեսոր Մարիո Սիերվոն: Նա ընդգծել է. շաբաթական մինչև 10 ժամ խաղալը ընդհանուր առմամբ անվտանգ է: Առողջության համար ռիսկն ի հայտ է գալիս հենց այս շեմը գերազանցելու դեպքում:

Առողջությունը պահպանելու համար հետազոտողները խորհուրդ են տալիս. Խաղային սեանսների ժամանակ կանոնավոր ընդմիջումներ անել: Խուսափել ուշ ժամերին խաղալուց, ինչը խանգարում է քուն մտնելուն: Խաղի ընթացքում արագ սննդի (fast food) և քաղցրավենիքի փոխարեն ընտրել առողջարար թեթև ուտեստներ:

Քերթինի համալսարանի գիտնականները պարզել են, որ շաբաթական 10 ժամից ավելի տեսախաղերը վատթարացնում են սննդի որակը, քունը և հանգեցնում ավելորդ քաշի կուտակման: Մինչև 10 ժամը համարվում է անվտանգ սահման, որից հետո սկսվում են բացասական փոփոխությունները: Խորհուրդ է տրվում պահպանել չափավորությունը և ընդմիջումներ անել: