Դատարանը բավարարել է Բագրատ սրբազանի տեսակցությունների սահմանափակման վերացման վերաբերյալ միջնորդությունը

«Ես վերաքննիչ բողոք էի ներկայացրել Բագրատ սրբազանի տեսակցությունների արգելքն ամբողջովին վերացնելու վերաբերյալ, իսկ փաստաբան Արամ Օրբելյանը՝ կալանքն ամբողջությամբ վերացնելու վերաբերյալ։ Վերաքննիչ դատարանից մեզ բանավոր հայտնել են, որ պարոն Օրբելյանի ներկայացրած բողոքը մերժվել է, իսկ իմը՝ բավարարվել, ենթադրում եմ՝ ամբողջությամբ»,- @ArmeniaSputnik-ին հայտնեց Հովհաննես Խուդոյանը։

Հիշեցնենք, որ Հունիսի 24-ին մի խումբ իրավապահներ ներխուժեցին «Սրբազան պայքարի» առաջնորդ Բագրատ արքեպիսկոպոս Գալստանյանի կեցավայր ու ձերբակալեցին նրան։ Արդեն հաջորդ օրը դատարանը սրբազանին ու նրա մեկ տասնյակից ավել կողմնակիցներին կալանավորեց «ահաբեկչության» ու «սահմանադրական կարգի տապալման» հոդվածներով։ Այս քրեական գործը «անոնսեց» ինքը՝ Փաշինյանը, հայտարարելով, թե կանխվել է «աննախադեպ ծավալների ահաբեկչություն»։

ՔԿ-ի ներկայացրած տեսանյութը, սակայն, որտեղ Սրբազանն իբր խոսում էր ինչ-որ սպանությունների մասին, հետագայում պարզվեց, որ մոնտաժված է, իսկ փաստաբան Հովհաննես Խուդոյանը հրապարակեց ամբողջական հատվածը, ինչից պարզ դարձավ, որ զրույցն ընթացել է ամենևին ոչ բռնի իշխանափոխության մասին։