«ՊԵԿ փոխնախագահի հայրը ճնշում է, որ տունս շուկայականից ցածր գնով վաճառեմ». ի՞նչ է կատարվում Իսահակյան 42-ում

Երևանի Իսահակյան 42 հասցեի բնակիչ Տիգրան Հարությունյանն ահազանգում է, որ ՀՀ ՊԵԿ նախագահ Ռաֆայել Գևորգյանի հայրը՝ Համլետ Գևորգյանը փորձում է ստիտել շուկայականից ցածր գնով վաճառել Տիգրանի ընտանիքին պատկանող բնակարանը։ NEWS.am–ի հետ զրույցում Տիգրանը պատմում է, որ կյանքի մեծ մասն այդ տանն է անցկացրել. շենքում 5 բնակարան կա՝ 3–ը Տիգրանին ու նրա ընտանիքին է պատկանում, 2-ը՝ ՊԵԿ փոխնախագահի ընտանիքին։ Քաղաքապետարանում, սակայն, 9 հասցեների ցուցակ է ներկայացված։

«Ամեն ինչ սկսեց, երբ մեր շենքի կողքին շինարարություն էր սկսվել, մենք էլ ասացինք, որ ուզում ենք նման ձևով մեր շենքն էլ վերակառուցել։ Առաջարկ եղավ միասին վերակառուցել շենքը և բաժանել հողը։ Սակայն մեզ պատասխանեցին, որ եթե ուզում եք ինչ–որ բան կառուցել, պիտի ամբողջ հողը մեզ տաք։ Ինձ համար դա անընդունելի էր, գիտակցում էի, որ շենքի հիմքը քանդելու են։ Ես մերժեցի նրանց։ Նրանք ինձ սկսեցին սպառնալ, որ սյուները կքանդեն։ Հայց ներկայացրին դատարան՝ սյուները և տունս քանդելու համար և պարտվեցին։ Հետո էլ վերաքննիչ դատարան դիմեցին, որտեղ նույնպես պարտվեցին, սակայն առ այսօր չեն ստացել դատական ակտը։ Հարց է առաջանում՝ ինչու՞ չեն ստացել։ Դեռ վերաքննիչ վարչական դատարանի որոշումը չեն ստացել, բայց շենքը շարունակում են քանդել»,–պատմեց Տիգրան Հարությունյանն ու նշեց, որ շինարարական աշխատանքների հետևանքով շենքի հիմքերը թուլացել են, բնակարանի ներսում ճաքեր են առաջացել, շինությունն էլ 3-րդ կարգի վթարային է դարձել։

Տիգրանի խոսքով, այս տարիների ընթացքում իր ընտանիքը դիմել է բոլոր հնարավոր գերատեսչություններին, սակայն պատշաճ քայլեր չեն ձեռնարկվել խնդիրը լուծելու ուղղությամբ։

«Ես այս պահին շենքի երրորդ հարկում եմ ապրում, երկրորդ հարկում իսպանացի ընկերս է ապրում, որը դիվանագիտական անձնագրով Հայաստանում է։ Շենքում փաստացի երկուսով ենք,  մեր կյանքի ու առողջության իրավունքը կոպտագույն ձևով ոտնահարվում է, էլ չեմ խոսում իր սեփականության իրավունքի մասին։ Այս պահին շինարարությունը դադարեցվել է, որովհետև ես ամեն ինչ արեցի, որպեսզի թույլ չտամ անտեսել դատական վճիռն ու սեյսմիկ փորձաքննության արդյունքները»,–ասաց նա։

ՊԵԿ փոխնախագահ Ռաֆայել Գևորգյանը չի ընդունում իրեն վերագրվող մեղադրանքները, և պնդում է, որ որ շինարարական աշխատանքների նպատակը շենքի հիմքերն ամրեցնելն է։ Ռաֆայել Գևորգյանն էլ իր հերթին Տիգրան Հարությունյանին է մեղադրում՝ շինարակական աշխատանքների ընթացքը խանգարելու համար։ Նա նաև հակադարձում է, որ մինչ իր կողմից շինարարության սկսելը, Տիգրան Հարությունյանն է ձեղնահարկում քանդման աշխատանքներ իրականացրել, ինչի հետևանքով իր բնակարանի դռները դեֆորմացվել են։

News.am-ի բարձրացրած հարցին ի պատասխան ՊԵԿ-ից հայտնեցին, որ քաղաքացին սուտ տեղեկություններ է հրապարակել: Ավելին, առաջիկայում նախատեսվում է նրա դեմ զրպարտության վերաբերյալ հայց ներկայացնել դատարան և հաղորդում տալ իրավապահ մարմիններին՝ քրեական վարույթ նախաձեռնելու համար։