Ով ասում է, որ ես Գյումրին թալանել եմ, նա սրբապիղծ է. ի՞նչ է եղել, որ ինչ թալանեինք. Վարդան Ղուկասյան

Մեր կյանքը ընդհանրապես նկուղներում չի եղել. մեր կյանքը միշտ ժողովրդի մեջ է եղել, ես ապտակով սնված տղա եմ, և հավանական է, մարդիկ իրենց ապրած կյանքն են ուզում գցել մեկ ուրիշի վրա, ինչն իհարկե, իրենց մոտ իհարկե չի ստացվում: Այս մասին NEWS.am-ի հետ զրույցում նշեց Գյումրիի նախկին քաղաքապետ, այսօր քաղաքապետի թեկնածու Վարդան Ղուկասյանը՝ անդրադառնալով Նիկոլ Փաշինյանի հայտարարություններին, ով անդրադառնալով Գյումիի քաղաքապետի թեկնածուներին, ասել էր, որ առնետները նկուղներից դուրս են եկել, մեր խնդիրն է այդ առնետներին վերադարձնել այնտեղ, հատիկ առ հատիկ վերադարձնել բոլոր թալանածը, որը նաև եղել է Գյումրիում:

«ՏԻՄ ընտրությունների ժամանակ Ռոբերտ Քոչարյանը ասում էր՝ ինձ համար շատ կարևոր է, թե ժողովուրդը ում կընտրի, թող իր միջի ամենաարժանիին ընտրի, որպեսզի հետո չասեն, թե ես խառնվել եմ: Իսկ հետո այդ ընտրված անձը ուզի, թե չուզի, պետք է աշխատի պետության հետ:

Շատ կարևոր բան է, երբ ընտրությունը թափանցիկ և արդար է լինում, իսկ հիմա վարչապետը եկել է ու ռեպրեսիա է անում ընտրվող մարդկանց նկատմամբ, իր թեկնածոյին առել է կողքը, գովաբանում է: Ու ինքը խոսում է թափանցիկությունից։

Իր քաղաքական հայր հանդիսացող Լևոն Տեր-Պետրոսյանի ժամանակ, 1996-ին, ես 35 տարեկան էի և հաղթեցի ամբողջ պետական կառույցներին: Իրենք արկղները վերցրեցին ու իրենցը բերեցին, դրեցին, չթողեցին, որ ես անցնեի, սարսափելի կեղծիքներ են արել, իսկ Ռոբերտ Քոչարյանի ժամանակ ՏԻՄ ընտրություններում այդպիսի բան չի եղել:

Եթե որևիցե մեկը գա, ասի, թե ես իմ ընտրությունների ժամանակ փող եմ բաժանել, կամ ինչ-որ կեղծիք եմ արել… իմ այո-ն այո է, ոչ-ը՝ ոչ։ Հիմա կտեսնենք, հիմա էլ հո քաղաքապետ չեմ ես: Կտեսնենք՝ ժողովուրդ իմ հետևից գնում է, թե չի գնում։

Դրանից հետո շատ մարդիկ, որ ուզում են իրենց չկայացած լինելը վերագրել նրան, թե ընտրությունները մեր օրոք կեղծվել են, իրենք իրենց շապիկը կպատռեն: Կտեսնենք, թե իրենք ինչքան ձայն կհավաքեն»,-ասաց նա:

Ադրադառնալով մեղադրանքներին, որ իր քաղաքապետ։ եղած ժամանակ թալանել է Գյումրին, հիմա պետք է վերադարձնի, Վարդան Ղուկասյանն ասաց. «Ով ասում է, որ ես Գյումրին թալանել եմ, նա սրբապիղծ է։ Ես ինչ որ աշխատել եմ իմ ժամանակահատվածում, Հայաստանի ոչ մի կառույց այդպես մաքուր չի աշխատել, ոնց որ իմ կառույցն է աշխատել։ Ես որ աշխատել եմ, վերադաս կառույցները ամեն երեք ամիս մեկ ինձ մոտ ստուգել են, մինչև այսօր ստուգում են:

Էս սորոսականները մի բան են սովորել, որ եթե 50 անգամ, 100 անգամ ասեն, որ Վարդան Մամիկոնյանը, Շարլ Անզնավուրը, Անդրանիկ զորավարը թալանել են, գող են եղել, ժողովրդի մեջ կարծիք է փոխվում։ Հիմա սրանք ինչ ուզենան, կասեն։

Եթե էդքան թալանել ենք, բանկերի մեծ տակ ճռռում ենք, ու՞ր է բա այդ փողերը։ Այդ ի՞նչ ենք թալանել, այդտեղ ի՞նչ է եղել, որ ինչ թալանեինք»,- հայտարարեց Վարդան Ղուկասյանը:

Նշենք, որ Գյումրիում ավագանու ընտրությունները տեղի են ունենալու մարտի 30-ին, իսկ քարոզարշավը կսկսվի մարտի 15-ին: