Էրեբունիում բնակիչները ծորակի ջուրը չեն խմում, ցայտաղբյուրից շշերով են տանում տուն

Էրեբունի վարչական շրջանի բնակիչներն արդեն մեկ ամիս է` խմելու ջուրը ցայտաղբյուրից են շշերով տանում տուն: Ասում են` ծորակից հոսող ջրի հոտն ու համն անտանելի են: Խմում են փողոցի ծայրին գտնվող ցայտաղբյուրից վերցրած ջուրը, որը, նրանց խոսքով, ոչ թե արտեզյան ջուր է, որը հոսում է իրենց ծորակներից, այլ Գառնու ջուրն է։ NEWS.am-ի թղթակցի հետ զրույցում Էրեբունի վարչական շրջանի բնակիչ Սամվել Մելքոնյանն ասում է. «Ժանգահոտ, կանալիզացիայի հոտ, խմում ես՝ սիրտդ խառնում է: Երեխաները խմում են, թունավորվում: Ցայտաղբյուրի ջուրը տանում եմ, սառնարան ենք դնում, մի քանի օր օգտագործում»:

Էրեբունու բնակիչ Հակոբ Մազմանյանն էլ ասում է` ոչ միայն ջրի որակն է խնդիրը, այլև այն, որ ամեն գիշեր անջատում են։

«Նախ համն է շատ վատը, հետո այն, որ գիշերն անջատում են, առավոտյան 7:30 նոր ջուր են տալիս: Եթե մարդիկ շտապում են գնալ գործի, անգամ լվացվելու ջուր չի լինում: Ջուրը դեղնոտ է լինում, նախորդ տարիներին ընդհանրապես հող էր գալիս»,-ասում է նա:

61-ամյա Հռիփսիմե Չավուշյանն էլ ստիպված է բավական երկար տարածություն ձեռքով տանել ջրի ծանր տարրաները: Ասում է` ծորակի ջրով լողանալուց հետո անգամ տհաճ հոտ են առնում, ինչպե՞ս կարող է երեխաների համար դրանով ուտելիք պատրաստել:

«Մի երկու անգամ եկել տարել եմ, հիմա նորից եմ տանում, որ կարողանամ երեխաների համար ճաշ եփել: Վեոլիա ջուր շատ եմ զանգել, ասել, որ ահավոր ա մեր վիճակը, հատկապես ամռանը, երբ ջրի կարիքը շատ կա: Ասում են՝ քայլեր կձեռնարկենք, բայց ինչպես տեսնում եք` սայլը տեղից չի շարժվում»:

«Վեոլիա ջուր» ընկերությունը պարզաբանում է․ ամռանը ջրի սպառման ծավալը կտրուկ աճում է, այդ պատճառով էլ Մասիսի և Երևանի մի շարք բնակավայրերում մարդկանց մատակարարվում է Արարատյան խորքային հորերի ջուրը։

Ընկերությունից NEWS.am-ին հայտնեցին, որ ամեն օր նմուշառում են իրականացնում, առողջության համար վտանգավոր ոչինչ ջրում չի հայտնաբերվել, որակի վերաբերյալ որևէ կառույցից ահազանգ չեն ստացել: Ջրամատակարար ընկերությունն ընդունում է, որ համային տարբերություն բնակիչները կարող են զգալ, բայց պնդում է՝ որակի վրա դա չի ազդել։