Սաուդյան Արաբիայում 4000 տարվա վաղեմության ամրություններ են հայտնագործել

Գիտնականները Սաուդյան Արաբիայի հյուսիս-արևմուտքում 4000 տարվա վաղեմության հսկայական ամրություններ են հայտնագործել, հայտնում է «Journal of Archaeological Science: Reports» ամսագիրը։

Հյուսիսարաբական անապատի օազիսները մ.թ.ա 4-րդ և 3-րդ հազարամյակներում բնակեցված են եղել նստակյաց բնակչությամբ։ Խայբար օազիսը շրջապատող ամրությունը՝ այս ժամանակաշրջանից հայտնի ամենահին կառույցներից մեկը, հայտնաբերվել է «CNRS1»-ի և Ալ-Ուլայի թագավորական հանձնաժողովի (RCU) գիտնականների խմբի կողմից:

Թայմայի մոտ գտնվող այս նորահայտ պարսպապատ օազիսը Սաուդյան Արաբիայի երկու ամենամեծ օազիսներից մեկն է, հաղորդում է «Planet Today»-ը։ Չնայած բրոնզի դարին թվագրվող մի քանի պարսպապատ օազիսներ նախկինում փաստագրված էին, սակայն այս կարևոր հայտնագործությունը նոր լույս է սփռում Սաուդյան Արաբիայի հյուսիս-արևմուտքում մարդկության թողած հետքի վրա։

Հնագիտական այս ​​հայտնագործությունը ճանապարհ է հարթում Արաբական թերակղզու հյուսիսարևմտյան հատվածի նախապատմական, նախաիսլամական և իսլամական անցյալի նվաճումների բացահայտման համար։