Ուկրաինայի ՆԳՆ-ն հետախուզում է հայտարարել պատրիարք Կիրիլի նկատմամբ
Ուկրաինայի ներքին գործերի նախարարությունը հետախուզում է հայտարարել Ռուսական Ուղղափառ Եկեղեցու պատրիարք Կիրիլի նկատմամբ՝ նրան «նախաքննությունից թաքնված» անձ հայտարարելով։ Այս մասին հայտնում է ՌԻԱ Նովոստին՝ գերատեսչությանը հղումով։
Ուկրաինայի ՆԳՆ տվյալների բազայի համաձայն՝ պատրիարք Կիրիլը նոյեմբերի 11-ից հետախուզման մեջ է գտնվում Ուկրաինայի անվտանգության ծառայության կողմից։ Տվյալների բազայում նշվում է նաև խափանման միջոցը՝ կալանավորում։ Հետախուզվողի տվյալներին կցված է պատրիարքի լուսանկարը և նրա աշխարհիկ անունը՝ Վլադիմիր Գունդյաև։
Հիշեցնենք, որ նոյեմբերի սկզբին Ուկրաինայի գլխավոր դատախազությունը հեռակա կարգով մեղադրանք էր ներկայացրել պատրիարք Կիրիլին։ Ինչպես նշված էր դատախազության հայտարարության մեջ, պատրիարքին տեղեկացվել է, որ նա կասկածվում է Ուկրաինայի տարածքային ամբողջականության և անձեռնմխելիության դեմ ոտնձգության մեջ։