Հս. Կորեան ուղեծիր է հանել իր առաջին լրտեսական արբանյակը. արձակմանը հետևել է Կիմ Չեն Ընը
Հյուսիսային Կորեան հայտարարել է իր առաջին լրտեսական արբանյակն ուղեծիր հանելու մասին՝ խոստանալով, որ առաջիկայում ավելի շատ սարքեր կարձարկի: Հյուսիսային Կորեայի պետական լրատվամիջոցների հրապարակած լուսանկարներում երևում է, որ երկրի առաջնորդ Կիմ Չեն Ընը հետևել է հյուսիսային Փհենյանից լրտեսական արբանյակի արձակման գործընթացին, գրում է Daily Mail-ը:
Հյուսիսային Կորեայի պետական լրատվական գործակալությունը հայտնել է, որ Malligyong-1 արբանյակը արձակվել է Chollima-1 հրթիռով ժամը 22:42-ին և ուղեծիր է մտել 22:54-ին:
Հարավային Կորեայի և Ճապոնիայի պաշտոնյաները, որոնք առաջին անգամ հայտնել են արձակման մասին, չեն կարողացել անմիջապես ստուգել, թե արդյոք արբանյակը ուղեծրում է: Պենտագոնի խոսնակ Սաբրինա Սինգհը հայտարարել է, որ ԱՄՆ զինված ուժերը դեռևս ուսումնասիրում են, թե արդյոք արձակումը հաջող է եղել: