Թեհրանը հայտնել է, որ ԱՄՆ-ն Իրանին խնդրել է չմիջամտել պաղեստինա-իսրայելական հակամարտությանը
ԱՄՆ-ը դիվանագիտական ուղիներով Իրանին խնդրել է չմիջամտել պաղեստինա-իսրայելական հակամարտությանը։ Այս մասին հայտարարել է Իսլամական Հանրապետության արտաքին գործերի նախարարության ղեկավար Հոսեյն Ամիր Աբդոլլահյանն Ադրբեջանի, Հայաստանի, Իրանի, Ռուսաստանի և Թուրքիայի արտաքին գործերի նախարարների մակարդակով «3+3» ձևաչափի հանդիպման արդյունքներով կայացած մամուլի ասուլիսում։
«Ամերիկացիները մեզ առնվազն երկու անգամ հաղորդագրություններ են ուղարկել, որոնք պարունակում էին երկու հիմնական կետ։ Նրանք ընդգծել են, որ շահագրգռված չեն [պաղեստինա-իսրայելական] հակամարտության գոտուց դուրս ռազմական գործողությունների տարածմամբ, և Իրանին խնդրել են զսպվածություն ցուցաբերել»,- նախարարի խոսքերն է մեջբերում IRNA գործակալությունը։
Աբդոլլահյանն ասել է, որ պաղեստինյան արմատական ՀԱՄԱՍ շարժման առաջնորդներն իրեն հավաստիացրել են Իսրայելի հետ երկար առճակատման իրենց պատրաստակամության մասին։
«Կիրակի երեկոյան ես խոսեցի [Համասի քաղբյուրոյի ղեկավար Իսմայիլ] Հանիյեի և [Իսլամական ջիհադի առաջնորդ Զիյադ] ալ-Նահալի հետ, ովքեր ինձ տեղեկացրեցին Գազայի վերջին զարգացումների մասին։ Դիմադրության առաջնորդներն ընդգծում են, որ իրենք պատրաստ են երկարատև պայքարի Սիոնիստական ռեժիմի դեմ և հետևաբար պահանջում են դադարեցնել հարձակումները խաղաղ բնակչության վրա»,- ասել է Աբդոլլահյանը «3+3» ձևաչափի մակարդակով Ադրբեջանի, Հայաստանի, Իրանի, Ռուսաստանի և Թուրքիայի արտգործնախարարների հանդիպումից հետո կայացած մամուլի ասուլիսում։