Հայտնի է, թե երբ Apple-ը կարտադրի իր բյուջետային նոր սմարթֆոնը

Apple-ը երեք տարով՝ մինչև 2025-ը, հետաձգել է իր չորրորդ սերնդի բյուջետային iPhone SE սմարթֆոնի նոր տարբերակի արտադրությունը։ Հետաձգման պատճառը OLED էկրանների մատակարարման հետ կապված խնդիրներն են։

Ինչպես տեղեկացնում է կորեական The Elec կայքը, վկայակոչելով UBI Research-ի վերլուծաբան Դաե-Ջոնգ Յունին, չինական BOE ընկերությունը պետք է էկրաններ մատակարարեր iPhone SE 4-ի համար, սակայն չի կարողացել բավարարել Apple-ի որակի պահանջները։

BOE-ն iPhone-ի համար OLED էկրանների երեք արտադրողներից մեկն է Samsung-ի և LG-ի հետ միասին: Այնուամենայնիվ, կորեական ընկերությունները շահագրգռված չեն iPhone SE 4-ի համար էկրաններ մատակարարել, քանի որ դրանք օգտագործում են այլ տեխնոլոգիա՝ LTPO, որը թույլ է տալիս ստեղծել ավելի առաջադեմ և թանկ էկրաններ iPhone-ի առաջատար մոդելների համար:

IPhone SE 4-ը համարվում է բյուջետային սմարթֆոն՝ հիմնված LTPS տեխնոլոգիայի վրա OLED էկրանով, որն ավելի քիչ էներգաարդյունավետ է և ավելի քիչ ֆունկցիոնալ, քան LTPO-ն։ Ըստ վերլուծաբանների՝ Apple-ին մոտ ապագայում չի հաջողվի գտնել OLED էկրանների այլընտրանքային մատակարար iPhone SE 4-ի համար, ուստի սարքի թողարկումը հետաձգվել է 2025-ին։

Ըստ տեղեկությունների՝ iPhone SE 4-ը կստանա 6,1 դյույմանոց OLED էկրան, Face ID և հարթ եզրերով կորպուս՝ ընկերության վերջին սմարթֆոնների ոճով։ Բացի դրանից, սարքը համալրված կլինի սեփական 5G մոդեմով։

Apple-ը 2018-ից աշխատում է կապի սեփական մոդուլի ստեղծման վրա, իսկ 2019-ին գնել է Intel-ի սմարթֆոնների մոդեմների ստորաբաժանման մեծ մասը: Ըստ նախնական տվյալների՝ Apple-ի մշակումը պատրաստ կլինի միայն 2025-ին, հետևաբար iPhone 15-ում և iPhone 16-ում կկիրառվեն Qualcomm-ի լուծումները։

Ներկայիս iPhone SE մոդելը ներկայացվել է 2022-ի մարտին և դարձել է Apple-ի ամենաէժան սմարթֆոնը․ գինն սկսվում է 429 դոլարից: Սարքը ստացել է iPhone 8-ի «հնացած» դիզայնը՝ 4,7 դյույմանոց LCD էկրան, Touch ID սկաներ, մեկ 12 ՄՊ հիմնական տեսախցիկ և Apple A15 Bionic չիպ։