Բուլղարիայի ոստիկանությունը Զելենսկու այցի առիթով ուժեղացրել է անվտանգության միջոցները Սոֆիայում

Ուկրաինայի նախագահ Վլադիմիր Զելենսկու Բուլղարիա կատարելիք այցի հետ կապված՝ տեղի ոստիկանությունն ուժեղացրել է անվտանգության միջոցները երկրի մայրաքաղաքում, տեղեկացրել է bTV-ն։ Հեռուստաալիքի տեղեկացմամբ՝ դա վերաբերում է մի շարք կառավարական շենքերի, այդ թվում խորհրդարանին եւ Կենտրոնական բանկին, ինչպես նաեւ օդանավակայանին։

«Սպասվում է, որ այսօր՝ հուլիսի 6-ին, Զելենսկին կայցելի Սոֆիա պաշտոնական այցով։ Նրա ուղեւորությունը համընկնում է [Բուլղարիայի] խորհրդարանի կողմից ՆԱՏՕ-ին Ուկրաինայի անդամակցության աջակցության հռչակագրի ընդունմանը»,- նշվել է հաղորդագրությունում։

Տեղեկությունը, որ Զելենսկին պատրաստվում է այցելել Բուլղարիա, տեղի ԶԼՄ-ներում հայտնվել է դեռեւս հուլիսի 4-ին։ Հաջորդ օրը երկրի պաշտպանության նախարար Թոդոր Թագարեւը դժգոհել էր, որ տեղեկությունն Ուկրաինայի նախագահի այցի մասին հապճեպ բացահայտվել է, եւ չի բացառել դրա խափանման հնարավորությունը։ Միեւնույն ժամանակ, Բուլղարիայի վարչապետ Նիկոլայ Դենկովը հուլիսի 6-ին հաստատել է Զելենսկու այցը։ Երկրի ներսում Ուկրաինային աջակցության հարցում երկակի իրավիճակ է՝ կառավարությունը կողմ է Կիեւին օգնությունն (այդ թվում ռազմական) ավելացնելուն, այն դեպքում, երբ նախագահ Ռուբեն Ռադեւը հակառակ դիրքորոշում ունի։