Tinder-ը հեռանում է Ռուսաստանից. ծանոթությունների հանրահայտ հավելվածում արդեն անհնար է սվայփ անել

Ծանոթությունների հանրահայտ Tinder հավելվածը դադարեցրել է աշխատանքը Ռուսաստանում։ Ռուսաստանցիներն արդեն չեն կարող գտնել եւ ներբեռնել այդ հավելվածը Google Play-ում եւ App Store-ում, իրենց երկրի համար հավելվածը փակվել է։

Ինչպես տեղեկացրել է ТАСС-ը, Android-ով աշխատող սարքերից դեռ կարելի է մտնել գոյություն ունեցող օգտահաշիվ այդ հավելվածում, բայց չի կարելի օգտվել դրա հիմնական գործառույթից, այսինքն՝«սվայփ անել» մարդկանց պրոֆիլներները։ Դա փորձելու ժամանակ հավելվածը ծանուցում է տալիս սխալի մասին եւ խնդրում է ավելի ուշ կրկին փորձել։ Սակայն հավելվածի գործառույթը նախկինի պես հասանելի է VPN միացնելիս։

Հունիսի 30-ից, ինչպես տեղեկացրել է հավելվածի տերը, Ռուսաստանում Tinder-ի վճարովի բաժանորդագրությունների երկարաձգումն ավտոմատ կերպով կդադարեցվի։ Օգտատերերը, որոնք մինչ այդ գնել էին կեսամյա եւ մեկ տարվա բաժանորդագրությունը, կկարողանան միջոցները վերադարձնել կայքում նշված հատուկ ձեւով։

Մինչեւ 2023թ. հունիսի 30-ը ռուսաստանցիները կարող էին հեռացնել օգտահաշիվը հավելվածի կարգավորումներում։ Այդ օրվանից հետո օգտատերը դա կարող է անել «Օգտահաշվի կառավարում» գործիքի օգնությամբ։

Հիշեցնենք, որ դեռեւս մայիսի սկզբին Match Group ընկերությունը, որը տնօրինում է ծանոթությունների մի շարք օնլայն-սերվիսներ, այդ թվում Tinder-ին, հայտարարել է, որ մինչեւ հունիսի 30-ը կհեռանա Ռուսաստանից։