Շոլցը Պրիգոժինի խռովության մասին. Պուտինը թուլացել է

Եվգենի Պրիգոժինի խռովությունը թուլացրել է ՌԴ նախագահ Վլադիմիր Պուտինին եւ երկարատեւ հետեւանքներ կունենա նրա իշխանության համար, ասել է Գերմանիայի կանցլեր Օլաֆ Շոլցը ARD հեռուստաալիքի հարցազրույցում։

Շոլցի խոսքով՝ Դաշնային հետախուզական բյուրոն (BND) նախապես չի իմացել պատրաստվող խռովության մասին։ Ինչ վերաբերում է ԶԼՄ-ների հաղորդումներին, որ ԱՄՆ հետախուզությունն իմացել է Պրիգոժինի պլանների մասին, բայց դաշնակիցներին չի տեղեկացրել, Շոլցն ասել է, որ կքննարկի այդ հարցը։

«Ցանկացած պարագայում, դա երկարատեւ հետեւանքներ կունենա Ռուսաստանի համար։ Ես հավատում եմ, որ նա (Պուտինը) թուլացել է»,- ասել է Շոլցը։

Նրա խոսքով՝ խռովությունը ցույց է տվել, որ «ավտոկրատական կառույցներում, ուժային կառույցներում կան ճաքեր», եւ որ Պուտինն այնքան էլ ամուր չի նստած թամբին, ինչպես քանիցս հավաստիացրել է։ «Բայց ես չեմ ցանկանում կռահումներ անել, թե որքան ժամանակ նա կգտնվի իշխանության ղեկին։ Դա կարող է երկար տեւել կամ ոչ։ Մենք դա չգիտենք»,- ասել է Շոլցը։

«Վագներ» ՄՌԿ-ի զինվորների հնարավոր տեղափոխումը Բելառուս անհանգստություն է առաջացրել ՆԱՏՕ երկրներում, ասել է Շոլցը։ «Դա իրավիճակ է, որին մենք նայում ենք մեծ տագնապով եւ ուշադիր ուսումնասիրում ենք»,- ասել է կանցլերը։ «Ագրեսիվ բանակները սպառնալիք են ներկայացնում, իսկ մասնավոր բանակները՝ առավել եւս»,- ասել է նա՝ ընդգծելով, որ Գերմանիան եւ նրա գործընկերներն անօգնական չեն այս իրավիճակում։ «Որպես ՆԱՏՕ մենք կարող ենք պաշտպանել մեր տարածքը»,- ասել է Շոլցը։

Գերմանիայի կանցլերը նշել է, որ հունիսի 24-ին հեռախոսազրույցներ է ունեցել ոչ միայն ԱՄՆ նախագահ Ջո Բայդենի, Ֆրանսիայի նախագահ Էմանուել Մակրոնի եւ Մեծ Բրիտանիայի վարչապետ Ռիշի Սունակի, այլեւ Լեհաստանի վարչապետ Մաթեուշ Մորավեցկու հետ։ «Մենք ոչ մի կապ չունենք առճակատման հետ Ռուսաստանում»,- ընդգծել է Շոլցը։ «Իշխանափոխությունը Ռուսաստանում Ուկրաինային մեր աջակցության նպատակը չէ»,- ավելացրել է նա։