«Վագների» ռազմերթը դեպի Մոսկվա շատ լուրջ հարված հասցրեց Կրեմլի իմիջին․ քաղաքագետ

Մոսկվայի ուղղությամբ «Վագներ» ՄՌԿ-ի ռազմերթը խռովություն է, եւ այն պատահական չէր։ Այս մասին NEWS.am -ի թղթակցի հետ զրույցում ասաց քաղաքագետ Ալեքսանդր Իսկանդարյանը։

Սա, ըստ փորձագետի, ներէլիտային ճգնաժամի դրսեւորում էր։ Մասնավորապես՝ կապված ուկրաինական պատերազմի հետ։ «Այս ամենն անհետեւանք չի անցնի։ Ի վերջո, դա շատ լուրջ հարված հասցրեց Կրեմլի իմիջին»,- հայտարարեց Իսկանդարյանը։

Փորձագետի խոսքով՝ այս ճգնաժամի պատճառներն այսօր չեն առաջացել։ Դրանք տեսանելի էին նաեւ նախկինում։ Նա, մասնավորապես, մատնանշեց ՄՌԿ-ի ղեկավար Եվգենի Պրիգոժինի բավականին հնչեղ հայտարարությունները։ Օրինակ՝ Ռուսաստանի Դաշնության պաշտպանության նախարարության հասցեին։ «Այդ ժամանակ Կրեմլը փոխեց իր քաղաքականությունը Վագների նկատմամբ։ Այն պահին, երբ քիչ թե շատ միանշանակ հրաման տրվեց «Վագների»՝ ՊՆ-ի ենթակայությանն անցնելու մասին, կողմերի նյարդերը, ըստ երեւույթին, տեղի տվեցին։

Շատ հնարավոր է, որ եւ էլիտայի ներսում եւ «Վագների» ներսում ին-ոչ բան տեղի ունեցավ։ Պրիգոժինը ՄՌԿ-ի միակ իրական ղեկավարը չէ։ Նա հանրային գործիչ է, որը գործում է համապատասխան տիրույթում», - նկատեց Իսկանդարյաը։

Հիշեցնենք, որ Պրիգոժինը հայտարարել էր Ուկրաինայի հետ պատերազմում ռուսական կողմի հսկայական կորուստների մասին, որոնք թաքցնում են իշխանությունները՝ հանդես գալով պաշտպանության նախարար Սերգեյ Շոյգուի եւ ՌԴ ԶՈւ գլխավոր շտաբի պետ Վալերի Գերասիմովի հասցեին կոշտ քննադատությամբ, որը մինչ օրս չի հերքվել։