Բորելն առաջարկել է 3,5 մլրդ եվրոյով ավելացնել Ուկրաինային ռազմական օգնության համար խաղաղության հիմնադրամի ծավալները

ԵՄ դիվանագիտության ղեկավար Ժոզեպ Բորելն առաջարկել է 3,5 մլրդ եվրոյով ավելացնել Խաղաղության եվրոպական հիմնադրամի ծավալները, որից ֆինանսավորվում է Ուկրաինային տրամադրվող ռազմական օգնությունը: Այս մասին հայտնում է Reuters գործակալությունը։

Ուկրաինային աջակցելու կապակցությամբ EPF-ն կուտակված միջոցները ծախսել է շատ ավելի արագ, քան նախատեսված էր ի սկզբանե, ուստի եվրոպական դիվանագիտության ղեկավարը նման խնդրանքով դիմել է ԵՄ անդամ երկրների կառավարություններին, նշել են գործակալության զրուցակիցները: Բրյուսելը ցանկանում է վստահ լինել, որ հիմնադրամի միջոցները կբավականացնեն եւ՛ Ուկրաինային աջակցելու, եւ՛ այլ երկրներին օգնելու համար։

Խաղաղության եվրոպական հիմնադրամը արտաբյուջետային գործիք է, որի ընդհանուր ծավալն այժմ կազմում է գրեթե ութ միլիարդ եվրո: Դրանից ԵՄ անդամ երկրները կփոխհատուցեն այն միջոցների մի մասը, որոնք նրանք փոխանցում են Ուկրաինային։ Այս պահի դրությամբ հիմնադրամից Ուկրաինային ռազմական օգնության համար արդեն ծախսվել է մոտ 4,6 մլրդ եվրո։

Եվրոպական Խաղաղության հիմնադրամի շնորհիվ ԵՄ-ն աջակցում է նաեւ այլ երկրների, ինչպիսիք են Մոզամբիկը, Վրաստանը, Մոլդովան, Մալին, Սոմալին, Նիգերը, Հորդանանը, Բոսնիա եւ Հերցեգովինան, Լիբանանը եւ Մավրիտանիան։