Բրիտանացի ոստիկանները գառ են գտել թմրանյութերով լցված մեքենայում
Շոտլանդիայում ոստիկանները գառ են գտել մի մեքենայում, որով 10 հազար ֆունտ սթեռլինգի կոկաին եւ հերոին էին տեղափոխում, գրել է Express-ը։
Ոստիկանները կանգնեցրել են մեքենան Գլազգոյից ոչ հեռու։ Մեքենան զննելիս Բիլի ոստիկանական շունը հայտնաբերել է 3 հազար ֆունտ սթեռլինգ արժողությամբ կոկաին եւ գաղտնարան, որտեղ 7 հազար ֆունտ արժողությամբ հերոին կար։
Ոստիկանության ներկայացուցիչն ասել է. «Երկու տղամարդ՝ 52 եւ 53 տարեկան, եւ մի կին՝ 38 տարեկան, ձերբակալվել են եւ մեղադրվում են թմրանյութերի հետ կապված հանցագործություններում»։
Թմրանյութերից զատ՝ մեքենայի հետեւի նստարանին գառ է հայտնաբերվել։ Շոտլանդիայի ոստիկանության ներկայացուցիչների խոսքով՝ կենդանին հանձնվել է տեղի ֆերմերներից մեկի խնամքին։