Սաուդյան Արաբիայի հարավ-արեւմուտքում ձյուն է տեղացել
Սաուդյան Արաբիայի հարավ-արեւմուտքում՝ Ալ-Բահա նահանգում, Պարսից Ծոցի երկրներում ավանդական շոգ սեզոնին ընդառաջ ձյուն է տեղացել, հաղորդում է «Արաբի 21» տեղեկատվական պորտալը։
Հրապարակման մեջ նշվում է, որ քաղաքի բնակիչները, սոցցանցերի օգտատերերը ձնով ծածկված փողոցների լուսանկարներ եւ տեսանյութեր են հրապարակել։ Փողոցներից տեխնիկայով մաքրում են ձյունը, ինչպես նաեւ ջրափոսերում լողացող կոտրված սառույցի կտորները։
Սաուդյան Արաբիայի մի շարք նահանգների, այդ թվում՝ Մեքքայի իշխանությունները վատ եղանակի, հորդառատ անձրեւների եւ քամիների պատճառով չորեքշաբթի բոլոր ուսումնական հաստատություններում չեղարկել են դասերը։ Հարեւան երկրներում՝ Կատարում եւ Քուվեյթում եղանակի կանխատեսման համաձայն, հինգշաբթի օրվանից մինչեւ հանգստյան օրերի վերջ, այնտեղ նույնպես առատ տեղումներ են սպասվում։