Google-ի աշխատակիցները ցույց են արել լոնդոնյան գրասենյակի դիմաց՝ ընդդեմ զանգվածային կրճատումների
Google-ի հարյուրավոր աշխատակիցներ երեքշաբթի ցույց են արել ընկերության լոնդոնյան գրասենյակի դիմաց՝ բողոքելով ընկերությունում զանգվածային կրճատումների դեմ։
Հիշեցնենք, որ այս տարվա հունվարին Google-ի մայր ընկերությունը՝ Alphabet-ը, հայտարարեց, որ ողջ աշխարհում աշխատանքից կազատի 12,000 աշխատակցի, կամ իր համաշխարհային աշխատուժի 6%-ին:
Unite արհեստակցական միությունը, որի անդամ են Մեծ Բրիտանիայում Google-ի հարյուրավոր աշխատակիցներ, հայտարարել է, որ ընկերությունն անտեսել է աշխատակիցների կողմից առաջ քաշված մտահոգությունները:
«Նրանք և Unite-ը չեն նահանջելու այնքան ժամանակ, մինչև Google-ը թույլ չտա, որ իր աշխատողները ներկայացված լինեն միության կողմից, պատշաճ կերպով չներգրավվի խորհրդակցությունների գործընթացին և իր անձնակազմին չվերաբերվի այն հարգանքով և արժանապատվությունով, որին նրանք արժանի են»,- հայտարարել է Unite-ը:
Նշենք, որ Միացյալ Թագավորությունում Google-ն ունի ավելի քան 5000 աշխատող։
Բողոքի ակցիային մասնակցող Google-ի մի աշխատակից, որը խնդրել է չնշել իր անունը, Reuters-ին ասել է, որ աշխատակիցների և ղեկավարության միջև բանակցությունները «չափազանց հիասթափեցնող» են եղել: «Թվում է, թե մեր մտահոգություններին ուշադրություն դարձնող չկա»,- ասել է նա։
Google-ի բարձրագույն ղեկավարությունը վերջերս կրճատումների շուրջ բանակցությունների մեջ է եղել Եվրոպայի շատ երկրներում։ Անցյալ ամիս ընկերության Ցյուրիխի գրասենյակի աշխատակիցները Շվեյցարիայում նմանատիպ ակցիա էին կազմակերպել, որի մասնակիցները պնդում էին, որ Google-ը մերժել է աշխատատեղերի կրճատումը նվազեցնելու իրենց առաջարկները:
Google-ի ներկայացուցիչն ասել է, թե ինչպես իրենք հայտարարել են հունվարի 20-ին, «մենք բարդ որոշում ենք կայացրել՝ կրճատելու մեր աշխատուժը մոտ 12,000-ով ողջ աշխարհում: Մենք գիտենք, որ սա շատ դժվար ժամանակ է մեր աշխատակիցների համար»։
«Մեծ Բրիտանիայում մենք կառուցողականորեն ներգրավվել և լսել ենք մեր աշխատակիցներին բազմաթիվ հանդիպումների ժամանակ և ամեն ինչ անում ենք հարցում հստակություն մտցնելու և նրանց հնարավորինս շուտ նոր տեղեկություններ հաղորդելու համար՝ Մեծ Բրիտանիայում գործող բոլոր գործընթացներին և իրավական պահանջներին համահունչ»,- հավելել է ընկերության ներկայացուցիչը։
Նշենք, որ կրճատումների մասին հայտարարել են ՏՏ ոլորտի բազմաթիվ ընկերություններ, այդ թվում՝ Meta-ն, Oracle-ը, Tesla-ն, Amazon-ն, Vimeo-ն, Twitter-ը և շատ այլ ընկերություններ։