Ֆրանսիայում սկանդալ է հասունացել Playboy ամսագրի շապիկին նախարարի լուսանկարի պատճառով

Ֆրանսիայում Սոցիալական տնտեսության և ֆրանսիական ասոցիացիաների նախարար Մառլեն Սկիապան քննադատության է ենթարկվել սեփական կուսակցության անդամների կողմից՝ Playboy ամսագրի շապիկին հայտնվելուց հետո, հայտնում է CNN-ը։

Սկիապան, ով կառավարության նախարար է 2017 թվականից, հայտնվել է ամսագրի շապիկին՝ 12 էջանոց հարցազրույցի ուղեկցությամբ, որը նա տվել է կանանց և ԼԳԲՏ իրավունքների մասին։ Սկիապան ամսագրի շապիկի համար լուսանկարվել է սպիտակ զգեստով։

Նա երկար ժամանակ եղել է կանանց իրավունքների պաշտպան և 2017 թվականին նշանակվել է երկրի պատմության մեջ առաջին անգամ գենդերային հավասարության գծով նախարար։

Նրա տեսքը քննադատության է արժանացել գործընկեր քաղաքական գործիչների, այդ թվում՝ Ֆրանսիայի վարչապետ Էլիզաբեթ Բորնի կողմից:

Բորնը նախարարի հայտնվելը ամսագրի շապիկին անվանել է «անպատշաճ, հատկապես այս պահին», շաբաթ օրը հաղորդել է BFMTV-ն՝ վկայակոչելով վարչապետին մոտ կանգնած աղբյուրը:

Ֆրանսիան ներկայումս քաղաքական և սոցիալական ճգնաժամ է ապրում, որն առաջացել է Ֆրանսիայի նախագահ Էմանուել Մակրոնի որոշմամբ՝ առաջ մղել կենսաթոշակային վիճահարույց բարեփոխումները՝ չնայած հասարակական լայնածավալ ընդդիմությանը:

Ֆրանսիացի քաղաքական գործիչ Ժան-Լյուկ Մելենշոնը, ով երրորդն էր 2022 թվականի նախագահական ընտրություններում, քննադատել է և՛ Սկիապայի հայտնվելը ամսագրի շապիկին, և՛ Ֆրանսիայի նախագահ Էմանուել Մակրոնի որոշումը՝ հարցազրույց տալ մանկական Pif Gadget ամսագրին:

«Մի երկրում, որտեղ նախագահն արտահայտվում է Pif-ում, իսկ նախարարը՝ Playboy-ում, խնդիրը կլինի ընդդիմությունը: Ֆրանսիան խելագարվում է»,- շաբաթ օրը Թվիթերում գրել է Մելանշոնը: