Ինդոնեզիայի ղեկավարը իշխանության մարմիններին կոչ է արել հրաժարվել Visa-ից եւ Mastercard-ից

Ինդոնեզիայի նախագահ Ջոկո Վիդոդոն երկրի տարածքային վարչակազմերին կոչ է արել հրաժարվել Mastercard եւ Visa վճարային ցանցերից՝ արեւմտյան պատժամիջոցների ֆոնին, գրում է ինդոնեզական Jakarta Post թերթը։

Նրա խոսքով՝ Mastercard-ից եւ Visa-ից հրաժարվելն անհրաժեշտ է գործարքները «աշխարհաքաղաքական հնարավոր հետեւանքներից» պաշտպանելու համար, ասել է Վիդոդոն:

«Շատ զգույշ եղեք։ Պետք է հիշենք Ռուսաստանի դեմ ԱՄՆ-ի սահմանած պատժամիջոցների մասին։ Visa-ն եւ Mastercard-ը կարող են խնդիր լինել»,- հինգշաբթի ասել է նախագահը:

Վիդոդոն պարզաբանել է, որ իրավիճակը Ուկրաինայում, ԱՄՆ-ի կողմից կիրառվող տնտեսական պատժամիջոցներով, կարող է խնդիրներ առաջացնել, քանի որ տնտեսական գործիքները, ներառյալ վճարային համակարգերը, կարող են օգտագործվել այն երկրների դեմ, որոնք ենթադրաբար ներգրավված են հակամարտության մեջ: