Գիտնականներն առաջարկում են Մալդիվները ծովի մակարդակից վեց մետր բարձրացնել

Արեւելյան Անգլիայի համալսարանի գիտնականները պարզել են, որ Մալդիվների երկարաժամկետ պաշտպանության համար անհրաժեշտ է դրանք ծովի մակարդակից վեց մետր բարձրացնել։ Առաջարկվում է դա նոր կղզիներ ավելացնելու կամ գոյություն ունեցողներն ընդլայնելու հաշվին անել։

Նման որոշումը կպաշտպանի Մալդիվների բնակիչներին ցունամիներից եւ հեղեղումներից, նշում են գիտնականները։ Այժմ կղզիների ավելի քան 80%-ը ծովից մոտ մեկ մետր է բարձրանում, եւ դա նրանց հատկապես խոցելի է դարձնում կլիմայական ճգնաժամի նկատմամբ:

Սակայն փորձագետները հաշվարկել են, որ Մալդիվները բարձրացնելը բավականին թանկ կարժենա՝ մոտ 8 միլիոն դոլար մեկ քառակուսի կիլոմետրի համար:

Գիտնականները նշել են, որ Մալդիվներում արդեն լցրել են նոր կղզի՝ Հուլհումալեն: Դա արվել է ծովի հատակից հանված ավազի հաշվին:

Հետազոտության հեղինակները նաեւ հավելել են, որ նոր տարածքների ընդլայնումն իմաստ ունի նաեւ այլ կղզի պետությունների համար, ինչպիսիք են Մարշալյան կղզիները, Տուվալուն եւ Կիրիբատին։