Լաչինի միջանցքում որեւէ անցակետի ստեղծում նախատեսված չէ. Լավրով
Լաչինի միջանցքի գործունեության ռեժիմը պետք է ամբողջությամբ համապատասխանի 2020 թվականի նոյեմբերի 9-ի առաջին եռակողմ հայտարարությանը։ Այս մասին փետրվարի 28-ին Բաքվում Ադրբեջանի արտգործնախարար Ջեյհուն Բայրամովի հետ համատեղ մամուլի ասուլիսի ժամանակ հայտարարել է Ռուսաստանի արտգործնախարար Սերգեյ Լավրովը։
Նա պարզաբանել է, որ դա նշանակում է բացառապես քաղաքացիական եւ ռազմական բեռների եւ քաղաքացիական անձանց համար ազատ տեղաշարժի ապահովման անհրաժեշտություն։
«Ահա դրան մենք հասնում ենք մեր շփումներում, առաջին հերթին՝ ռուսական խաղաղապահ զորախմբի գծով։ Այնտեղ նախատեսված չէ ինչ-որ անցակետերի ստեղծում, բայց տեխնիկական միջոցներով հնարավոր է վերացնել կասկածները, որոնք առկա են այն առնչությամբ, որ միջանցքն իսկապես օգտագործվում է ըստ նշանակության։ Մենք այսօր դրան անդրադարձել ենք, տեխնիկական դետալները երկրորդական նշանակություն ունեն»,-նշել է Լավրովը։