Արգենտինայում Բելառուսի նախկին դեսպանը, ով աջակցում էր ընդդիմությանը, հեռակա դատապարտվել է 5 տարվա ազատազրկման
Արգենտինայում Բելառուսի նախկին դեսպան Վլադիմիր Աստապենկոն, ով 2020 թվականին աջակցել է Բելառուսի ընդդիմությանը, հեռակա կարգով դատապարտվել է հինգ տարվա ազատազրկման եւ տուգանվել 18,5 հազար բելառուսական ռուբլով (մոտ 6,6 հազար դոլար), հայտնում է «Коммерсантъ»-ը։
Վլադիմիր Աստապենկոն մեղավոր է ճանաչվել Բելառուսի Հանրապետության քրեական օրենսգրքի 210-րդ հոդվածի 1-ին, 14-րդ եւ 3-րդ մասերով (գույքը խոշոր չափերով կալանք դնելու փորձ, որը կատարվել է պաշտոնատար անձի կողմից՝ օգտագործելով իր պաշտոնական լիազորությունները):
Համաներման շնորհիվ նախկին դեսպանը մասամբ ազատվել է հիմնական պատժից, ազատազրկման ժամկետը կրճատվել է մինչեւ չորս տարվա։
Հանրապետության գլխավոր դատախազության տվյալներով՝ 2020 թվականի հոկտեմբերին Արգենտինայում Բելառուսի դեսպանատունը դեսպանին եւ նրա ընտանիքի անդամներին վճարել է Բուենոս Այրես–Փարիզ–Մինսկ երթուղու ավիատոմսերի համար։ Սակայն Վլադիմիր Աստապենկոն չի օգտվել Մինսկի տոմսից եւ, առանց հանրապետության իշխանություններին տեղյակ պահելու, տոմսեր է պատվիրել Փարիզից Վարշավա։
2020 թվականի նոյեմբերի 3-ին Բելառուսի նախագահ Ալեքսանդր Լուկաշենկոն պաշտոնանկ է արել Վլադիմիր Աստապենկոյին՝ «դիվանագիտական ծառայության հետ անհամատեղելի վարքագծի» համար։ 2020 թվականի հոկտեմբերի 27-ին Վլադիմիր Աստապենկոն հրաժարականի դիմում է գրել, որում մեղադրել է «գործատուին»՝ օրենքը խախտելու համար՝ բացատրելով, որ չի կարող բարեխղճորեն կատարել իր պարտականությունները, քանի որ ենթարկվում է մի մարդու, «ով իրավունք չունի արտահայտելու բելառուս ժողովրդի կամքը»։