Առաջին քայլը մեծ փոփոխությունների ճանապարհին

Վաղուց արդեն կառավարող կուսակցությունը չի կարողանում կառավարել այնպես, ինչպես նախկինում, եւ ժողովուրդն էլ չեն ցանկանում ապրել այնպես, ինչպես հիմա: Սա նշանակում է, որ Հայաստանին օդի եւ ջրի նման փոփոխություններ են պետք:

Անչափ կարեւոր է, որ այդ փոփոխությունները լինեն առանց ցնցումների եւ ընտրությունների ճանապարհով: Արցախի խնդիր, ռազմաճակատի գծում լարվածություն եւ հարյուրավոր մարտահրավերների բախվող երկիրն իրավունք չունի կորցնել ընտրությունների միջոցով իշխանություն ձեւավորելու հնարավորությունը:

Ցավոք, կառավարող կուսակցությունը կամ այս կուսակցության որոշ ներկայացուցիչներ, ոտնատակ տալով առկա խնդիրները, փորձում են անել այնպես, ինչպես մինչ օրս եւ զանազան խորամանկություններով պահպանել իշխանությունը:

Ընդգծենք, որ մի երկիր, որտեղից միայն վերջին երկու տարում հեռացել է ավելի քան 90 հազար մարդ, իրավունք չունի դիմել հերթական ընտրակեղծիքներին: Իսկապես սթափվելու ժամանակն է, չնայած, մենք դեռ մի բան էլ ուշացել ենք:

Բարեբախտաբար, մեր կողքին դեռ կան առողջ քաղաքական գործիչներ, ուժեր, որոնք գիտակցում են իրավիճակի ամբողջ լրջությունը եւ մի կողմ դնելով երկրորդական տարաձայնությունները, համաձայնել են ջանքերը մեկտեղել հանուն Հայաստանի զարգացման եւ առաջընթացի:

Րաֆֆի Հովհաննիսյանը, Վարդան Օսկանյանը եւ Սեյրան Օհանյանը ցույց տվեցին, որ ոչ միայն քաղաքական, այլ նաեւ պետական գործիչներ են, որոնք պետության, ազգի շահը վեր են դասում նեղ անձնականից:

Նրանցից յուրաքանչյուրը հեշտությամբ կարող էր լեզու գտնել կառավարող ուժի հետ, տեղավորվել տաքուկ մի տեղ եւ անտարբեր մնալ երկրի հոգսերի նկատմամբ, բայց նրանք իրենց վրա մեծ պատասխանատվություն վերցրին եւ արեցին առաջին քայլը փոփոխությունների մեծ ճանապարհին:

Բնականաբար, ոմանք ուղղորդված, ոմանք առանց երկար մտածելու սկսելու են տարաբնույթ մեղադրանքներ ներկայացնել այս գործիչներին, հիշեցնելով անգամ, թե նրանք դպրոցում ինչ չարություն են արել, լավ ֆուտբոլ չեն խաղացել կամ կինոթատրոնում մի անգամ աղմուկ են բարձրացրել:

Հավատացեք, հիմա մեր երկիրն այն վիճակում եւ փուլում չէ, որ կենտրոնանանք այս մեղադրանքների վրա: Եւ նույնիսկ ժամանակը չէ, որ պատասխանենք իշխանությունների հրահանգով «Օհանյան-Րաֆֆի-Օսկանյան» դաշինքի դեմ ելույթ ունեցող այս կամ այն քաղաքական գործչին կամ քաղաքագետին: Հիմա այս երկիրը փոսից հանելու ժամանակն է:

Առաջին քայլն արվել է: Մնացել են մյուսները: Եւ այստեղ հսկայական նշանակություն ունի ժողովրդի դիրքորոշումը եւ կամքը: Ընդամենը պետք է մերժել առաջարկվող ընտրակաշառքը, ընդամենը պետք է հավատալ, որ ինչպես վրացիները կարողացան փոխել իրենց կյանքը, այնպես էլ մենք կարող ենք ուժեղ եւ զարգացող երկիր ունենալ: 

Գագիկ Մարտիրոսյան

Այս թեմայով Արցախցիների վերադարձի Իրավունքի ամուր հիմքերն այսօր արդեն դրված են. Վարդան Օսկանյան Եթե նպատակը իսկական խաղաղությունն է, այն պետք է վստահություն ներշնչի երկու կողմերին էլ Օսկանյանը նամակներ է հղել դեսպաններին՝ կոչ անելով ՀՀ իշխանությունների առջև բարձրացնել քաղբանտարկյալների հարցը Այսօր Լեռնային Ղարաբաղի հարցն ունի նոր ընկալում և աջակցություն․ Վարդան Օսկանյան Սեյրան Օհանյանի և Արծվիկ Մինասյանի դեմ քրգործ են ուզում հարուցել