Ինչ Զելենսկին ուզում է, դժվար թե ստանա Բայդենից․ Politico
Երբ չորեքշաբթի օրը Ուկրաինայի նախագահ Վլադիմիր Զելենսկին վայրէջք կատարի Վաշինգտոնում, նա կհայտնի իր ամենամեծ խնդրանքը, բայց կարող է չստանալ իրեն ցանկալի պատասխանը, գրում է Politico-ն։
Զելենսկու այցը ԱՄՆ, որտեղ նա պետք է հանդիպի նախագահ Ջո Բայդենի հետ եւ ելույթ կունենա Կոնգրեսի անդամների առջեւ, ցնցել է ինչպես ամերիկյան բարձրաստիճան պաշտոնյաների, այնպես էլ օրենսդիրներին։ Մինչ Վաշինգտոնում մեծ իրադարձության մասին խոսակցություններ են պտտվում, ոչ ոք չգիտեր Ուկրաինայի նախագահի ժամանման կամ պլանների ստույգ մանրամասները։
Այժմ, երբ անձնական հանդիպումը հաստատվել է, պաշտոնյաներն ասում են, թե ակնկալում են, որ սպառազինությունների շուրջ հակասություն կլինի եւ Բայդենն ու Զելենսկին հանդիպումը Կոնգրեսին սիրաշահելու համար օգտագործելու փորձ կանեն:
Կուլիսների հետեւում ամերիկացի եւ ուկրաինացի պաշտոնյաները ծրագրում էին այցը մի քանի շաբաթ շարունակ, հենց այն ժամանակ, երբ Վաշինգտոնն ու Կիեւը սկսեցին պատերազմի ապագայի վերաբերյալ ամենաթեժ վեճերից մեկը: Դեկտեմբերի 11-ին հեռախոսազրույցի ժամանակ Բայդենը Զելենսկուն հրավիրել էր Վաշինգտոն՝ քննարկելու առաջիկա ռազմական գործողությունները եւ այն ուղիները, որոնցով նրա վարչակազմը կարող է շարունակել աջակցել Ուկրաինային, լրագրողներին հայտնել է վարչակազմի բարձրաստիճան պաշտոնյան:
Այս զանգիցմի քանի շաբաթ առաջ ԱՄՆ պաշտոնյաները բանակցություններ էին վարում Կիեւում եւ Եվրոպայում իրենց գործընկերների հետ այն մասին, թե ինչ ԱՄՆ ռազմական աջակցություն կշարունակեն ցուցաբերել Ուկրաինային, որպեսզի օգնեն նրան պայքարել ձմռանը: Կիեւն ուղղակիորեն դիմել է Բայդենի վարչակազմին՝ ավելի լավ զենքեր ձեռք բերելու համար, որը, նրանց կարծիքով, կարող է հանգեցնել հաղթանակի: Սակայն ԱՄՆ-ը տատանվում է՝ հիասթափեցնելով ուկրաինացի պաշտոնյաներին։
Ակնկալվում է, որ այս թեման կգերակշռի Զելենսկու, նրա թիմի եւ Բայդենի վարչակազմի անձնական հանդիպման ժամանակ:
«Նրան ավելի մեծ հեռահարության զենքեր են պետք, որպեսզի նա կարողանա կանխել Ռուսաստանի սպասվող հարձակումը»,- ասել է Ուկրաինայում ԱՄՆ նախկին դեսպան Բիլ Թեյլորը: «Նա անհապաղ ֆինանսական աջակցության կարիք ունի, որպեսզի նրա կառավարությունը շարունակի ախատել, եւ նա գիտի, որ Կոնգրեսն այս շաբաթ որոշումներ կկայացնի այս հարցերի վերաբերյալ»:
Մինչ Բայդենի վարչակազմը խոստացել է շարունակել աջակցել Կիեւին ռուսական ուժերի դեմ պայքարում, ԱՄՆ պաշտոնյաները դեմ են արտահայտվել ցանկացած ռեսուրսների տրամադրմանը, որը թույլ կտա ուկրաինացիներին մեծ հեռահարության հրթիռներ արձակել:
Աղբյուրի խոսքով՝ Բայդենի եւ նրա ազգային անվտանգության թիմի հետ հանդիպման ժամանակ ուկրաինական պատվիրակությունը հանդես կգա բանակի մեծ հեռահարության մարտավարական հրթիռային համակարգերի կամ ATACMS-ի, ինչպես նաեւ Grey Eagle ու Reaper անօդաչու թռչող սարքերի տրամադրման եւս մեկ խնդրանքով:
Սակայն ԱՄՆ պաշտոնյաները պատրաստ չեն տեղից շարժվել: Բայդենի Սպիտակ տունը կտրականապես հրաժարվել է ATACMS-ներ ուղարկել: ԱՄՆ պաշտոնյաներն ասում են, որ ծախսերը մեծ են: Կիեւ մեծ հեռահարության հրթիռներ ուղարկելը կարող է Պուտինին դրդել Ուկրաինայի ներսում էլ ավելի մահացու զենք կիրառել:
ԱՄՆ-ի այս անվճռականությունն անհանգստացրել է ուկրաինացի պաշտոնյաներին եւ ստիպել երկրի բարձրաստիճան զինվորականներին օգնություն խնդրել ուրիշներից, այդ թվում՝ արեւմտյան դաշինքից դուրս գտնվող երկրներից: Ուկրաինացիները մտավախություն ունեն, որ այս ձմռանը չեն կարողանա առաջ գնալ մարտի դաշտում եւ կկորցնեն Խերսոնից հետո ձեռք բերած թափը։
Չորեքշաբթի օրը Բայդենը ծրագրում է հայտարարել, որ Ուկրաինային կտրամադրի այլ զինատեսակներ, որոնք նա խնդրել է։
Վարչակազմը կներկայացնի 2 միլիարդ դոլար արժողությամբ ռազմական օգնության նոր փաթեթ, որն առաջին անգամ կներառի Patriot հակահրթիռային պաշտպանության եւ ուղղակի հարձակման զինամթերքի հավաքածուներ, որոնք չկառավարվող ռումբերը վերածում են ճշգրիտ կառավարվող զինամթերքի:
Patriot-ի առաքումը որոշում է, որը զարմացրել է անգամ ուկրաինացի պաշտոնյաներին։ Patriot համակարգը Կիեւի համար երկար սպասված պարգեւ է, իսկ Ուկրաինայի համար տարբերակը նախատեսված է բալիստիկ հրթիռներ որսալու համար։
Թեեւ Բայդենի վարչակազմը չի կարծում, որ օգնությունն ամբողջությամբ կդադարի, պաշտոնյաները մասնավոր կերպով ընդունում են, որ կան մտավախություններ, որ ֆինանսավորման ծավալը, հավանաբար, կկրճատվի եւ կդանդաղի առաջիկա ամիսներին: Զելենսկու այցը, ասում են, կարող է պատվար լինել։