ՕՊԵԿ+-ի անդամները հանում են քաղաքականությունը որոշումների կայացման գործընթացից

ՕՊԵԿ+-ի անդամները հանում են քաղաքականությունը որոշումների կայացման գործընթացից, ինչպես նաեւ իրենց գնահատականներից եւ կանխատեսումներից, Սաուդյան Արաբիայի պետական լրատվական գործակալությանը տված հարցազրույցում ասել է Սաուդյան Արաբիայի էներգետիկայի նախարար արքայազն Աբդուլազիզ բեն Սալմանը։

Նախարարը հավելել է, որ նավթի արդյունահանման կրճատման մասին խիստ քննադատության ենթարկված ՕՊԵԿ+-ի որոշումը ճիշտ է եղել շուկայի եւ արդյունաբերության կայունությունը պահպանելու համար։

Նավթի գները, որոնք ուկրաինական պատերազմից հետո մարտ ամսին մոտեցել են պատմական առավելագույնին՝ 147 դոլար մեկ բարելի դիմաց, կորցրել են 2022 թվականի աճի մեծ մասը: Երեքշաբթի Brent տեսակի նավթը վաճառվել է շուրջ 80 դոլարով, հայտնում է Reuters-ը։

ՕՊԵԿ-ը եւ նրա դաշնակիցները, որոնք հայտնի են որպես ՕՊԵԿ+, ավելացրել են արդյունահանումը 2022 թվականի մեծ մասի համար՝ պահանջարկը վերականգնմանը զուգընթաց: Սակայն դեկտեմբերի 4-ին խումբը համաձայնել է պահպանել նոյեմբերից մինչեւ 2023 թվականը արտադրությունը օրական 2 միլիոն բարելով կրճատելու հոկտեմբերյան պլանը:

«Վիճակագրության եւ կանխատեսումների հետ քաղաքականություն խաղալը եւ օբյեկտիվության բացակայությունը հաճախ հակառակ արդյունք են տալիս եւ հանգեցնում վստահության կորստի»,- ասել է էներգետիկայի նախարարը:

Նրա խոսքով՝ անորոշությունների լայն շրջանակի պայմաններում ՕՊԵԿ+-ը չունի այլ ընտրություն, քան ակտիվ մնալը եւ առաջեւում լինելը։