Ուկրաինայում պատերազմի դադարեցման շուրջ Պուտինի հետ բանակցությունները դեռ «հնարավոր են»․ Մակրոն

Ֆրանսիայի նախագահ Էմանուել Մակրոնը կարծում է, որ Ուկրաինայում պատերազմի դադարեցման շուրջ Ռուսաստանի առաջնորդ Վլադիմիր Պուտինի հետ բանակցությունները դեռ «հնարավոր են»:

ABC News-ին տված հարցազրույցում, խոսելով Ուկրաինայում «հաջողված խաղաղության» իր տեսլականի մասին, Մակրոնը նշել է, որ այդ խաղաղությունը պետք է լինի «կայուն» եւ աջակցվի ուկրաինացիների կողմից։

«Լավ խաղաղությունը խաղաղություն չէ, որը կպարտադրվի ուկրաինացիներին ուրիշների կողմից»,- ասել է Մակրոնը՝ հավելելով. «Լավ խաղաղությունը այն խաղաղությունը չէ, որը միջնաժամկետ կամ երկարաժամկետ հեռանկարում չի ընդունի երկու կողմերից մեկը»։

«Կարծում եմ՝ նախագահ Պուտինը մեծ սխալ թույլ տվեց՝ սկսելով այս պատերազմը»,- ասել է Մակրոնը՝ հիշատակելով 2014 թվականից հետո Ուկրաինայի եւ Ռուսաստանի միջեւ կնքված Մինսկի համաձայնագրերը։

«Եղել է քաղաքական-դիվանագիտական գործընթաց՝ միջազգային հանրության մասնակցությամբ։ Եվ նա (ՌԴ նախագահը - խմբ.), հիմնվելով կեղծ նարատիվի վրա, ինքն է որոշել, որ ՆԱՏՕ-ն կօգտագործի Ուկրաինային Ռուսաստանի վրա հարձակվելու համար, ինչը լիովին սխալ է»,- ասել է Մակրոնը՝ հավելելով, թե, այնուամենայնիվ, հուսով է, որ Պուտինը «ռացիոնալ» կլինի պատերազմի դադարեցման բանակցություններում։ «[Պուտինը] ղեկին է եւ բավականին վաղուց իշխանության գլխին է... Նա ճանաչում է իր ժողովրդին: Կարծում եմ՝ նա սխալվել է»,- ասել է Մակրոնը։ «Մի՞թե հնարավոր չէ վերադառնալ բանակցությունների սեղանի շուրջ եւ ինչ-որ բան քննարկել։ Կարծում եմ՝ դա դեռ հնարավոր է»: