Իսրայելում նախկին վարչապետը կգլխավորի նոր կառավարությունը

Իսրայելում ամփոփվել են վերջին չորս տարվա ընթացքում այդ երկրում տեղի ունեցած 5-րդ արտահերթ խորհրդարանական ընտրությունների վերջնական արդյունքները: Այս անգամ, քիչ առավելությամբ առաջ են անցել աջամետ կուսակցությունները։ Քնեսեթում ունենալով մեծամասնություն, նրանք կկարողանան ձեւավորել հերթական կոալիցիոն կառավարությունը։

Իսրայելի նոր կառավարությունն ամենայն հավանականությամբ կգլխավորի նախկին վարչապետ Բենիամին Նաթանյահուն։ Վերջինս դեռ ընտրություններից առաջ գործարք էր կնքել օրթոդոքս հավատացյալ հրեաների եւ իսրայելական հասարակության կրոնասեր հատվածի շահերը ներկայացնող ուժերի հետ։

Ունենալով նաեւ «Կրոնական Սիոնիզմ» կուսակցության աջակցությունը, որը 14 մանդատով երրորդ քաղաքական ուժն է լինելու Քնեսեթում, Նաթանյահուն կունենա 64 մանդատ 120 հոգանոց խորհրդարանում եւ կկարողանա նոր կառավարություն ձեւավորել։ Հատկապես որ ապագա կոալիցիայի մեջ մտնելիք կուսակցությունները մեկ մեկու հետ սկզբունքային տարաձայնություններ չունեն։