Մակրոնը կառավարություն ստեղծելու մասին բանակցություններ է վարել Լը Պենի եւ կոմունիստների հետ

Ֆրանսիայի նախագահ Էմանուել Մակրոնը քննարկել է ազգային միասնության կառավարություն ստեղծելու հնարավորությունը ինչպես ծայրահեղ աջ «Ազգային միավորում» խմբակցության ղեկավար Մարին Լը Պենի, այնպես էլ կոմունիստների առաջնորդ Ֆաբիեն Ռուսելի հետ, հայտնում է BFM TV-ն։

Այսպես, Լը Պենը հաստատել է, որ հունիսի 21-ին Մակրոնի հետ քննարկել է կառավարություն ստեղծելու հարցը՝ հրաժարվելով մանրամասներ հայտնել։

Մինչ այս Ռուսելը, որն ընտրություններում Ժան-Լյուկ Մելանշոնի ձախ կոալիցիայի մաս էր կազմում, խոսել էր նախագահի հետ իր բանակցությունների մասին։ Նրա խոսքով՝ Մակրոնը կոմունիստի կարծիքն է հարցրել վարչապետ Էլիզաբեթ Բորնի եւ ազգային միասնության կառավարությունում աշխատելու պատրաստակամության մասին։ «Ես նրան ասացի, որ խոսքը ոչ թե մարդու մասին է, այլ այն մասին, թե ինչ ուղղություն նա կտա»,- մեկնաբանել է Ռուսելը հանդիպումը:

Հունիսի 19-ին նախագահամետ «Միասին» կոալիցիան հաղթել է Ֆրանսիայի խորհրդարանական ընտրություններում, սակայն 1958 թվականին Հինգերորդ հանրապետության գոյությունից հետո առաջին անգամ կորցրել է մեծամասնությունը օրենսդիր մարմնում։ Մելենշոնի «Նոր ժողովրդական էկոլոգիական եւ սոցիալական միությունը» զբաղեցրել է երկրորդ տեղը, իսկ «Ազգային միավորումը»՝ երրորդ տեղը։ Ֆրանսիայի աջ կենտրոնամետ Հանրապետական կուսակցության առաջնորդ Քրիստիան Ժակոբը, որը չորրորդ տեղն է զբաղեցրել, հրաժարվել է Մակրոնի հետ բանակցություններից։