Գերմանիայի կանցլերը կոչ է արել դյուրացնել ԵՄ-ին անդամակցության կարգը

Գերմանիայի կանցլեր Օլաֆ Շոլցը հանդես է եկել Եվրամիության բարեփոխումների օգտին`կողմ արտահայտվելով ԵՄ անդամակցությունը դյուրացնելուն: Այս մասին կանցլերը խոսել է DPA-ին տված հարցազրույցի ընթացքում:

Ըստ Շոլցի, ո՛չ միայն թեկնածուները, այլեւ Եվրոպական համայնքը պետք է պատրաստ լինեն նոր պետությունների անդամակցությանը, ինչի համար էլ միությունը պետք է արդիականացնի իր կառույցներն ու որոշումների կայացման գործընթացը:

«Միշտ չէ, որ հնարավոր է միաձայն որոշում կայացնել, նույնիսկ եթե այսօր ընթացակարգը այդպես է նախատեսում»,- ասել է Շոլցը։

Նա նշել է, որ այս հարցին ցանկանում է անդրադառնալ հունիսի 23-ից 24-ը կայանալիք ԵՄ գագաթնաժողովի ընթացքում, որտեղ անդամ 27 պետությունները քնարկելու են Ուկրաինայի, Մոլդովայի եւ Վրաստանի անդամակցության դիմումները։ Եվրահանձնաժողովը խորհուրդ է տվել, որ առաջին երկու պետություններին ԵՄ անդամակցության պաշտոնական թեկնածուի կարգավիճակ տրվի։

Թեկնածուի կարգավիճակի շնորհումը հնարավոր է միայն անդամ երկրների միաձայն աջակցությամբ, ինչը փոխելու վերաբերյալ քննարկումները ԵՄ-ում ավելի վաղ են սկսվել:

Գերմանիայի կանցլերը նաև հույս է հայտնել, որ գագաթնաժողովը թափ կհաղորդի Արևմտյան Բալկանների պետություններին, որոնք գրեթե երկու տասնամյակ սպասում են ԵՄ անդամակցությանը։

Հիշեցնենք, որ հունիսի 17-ին Եվրահանձնաժողովը առաջարկել է Ուկրաինային ԵՄ անդամակցության թեկնածուի կարգավիճակ շնորհել, ինչի մասին հայտնել է ԵՀ նախագահ Ուրսուլա Ֆոն դեր Լեյենը: