Չինաստանի եւ Ճապոնիայի պաշտպանության նախարարները 2019-ից առաջին անձնական հանդիպումն են նախապատրաստում․ Yomiuri

Ճապոնիայի պաշտպանության նախարար Նոբուո Կիսին բանակցություններ է վարում իր չինացի գործընկեր Վեյ Ֆենհեի հետ՝ անձնական հանդիպում կազմակերպելու մասին, որը տեղի կունենա Սինգապուրում՝ հունիսի 10-12-ը Ասիա-խաղաղօվկիանոսյան տարածաշրջանում անվտանգությանը նվիրված «Շանգրի-Լա երկխոսություն» միջազգային համաժողովի ընթացքում: Սա կլինի 2019 թվականի դեկտեմբերից ի վեր երկու երկրների ռազմական գերատեսչությունների ղեկավարների առաջին շփումը՝ Պեկինի եւ Տոկիոյի միջեւ վերջին շրջանում շատ սառը հարաբերությունների պայմաններում, չորեքշաբթի գրել է Yomiuri թերթը՝ հղում անելով Ճապոնիայի կառավարության աղբյուրներին։

Նրանց տվյալներով՝ հանդիպման ընթացքում, մասնավորապես, նախատեսվում է խորհրդակցություններ անցկացնել, որոնք ուղղված կլինեն նրան, որ մեկ տարվա ընթացքում երկու երկրների զինված ուժերի ղեկավարությունների միջեւ ուղիղ կապի գիծ գործարկվի՝ պատահական միջադեպերը կանխելու նպատակով։ Դրա ստեղծման մասին համաձայնությունը ձեռք է բերվել դեռեւս 2018 թվականի մայիսին՝ Չինաստանի եւ Ճապոնիայի ռազմանավերի հակամարտության ֆոնին՝ Արեւելաչինական ծովում Սենկակու կղզիների տարածքում, որը Պեկինը վիճարկում է Տոկիոյից։ Սակայն ուղիղ գիծը դեռեւս չի գործում մի շարք տեխնիկական խնդիրների եւ երկու երկրների միջեւ պարբերաբար սրվող լարվածության պատճառով։

Ճապոնիայի կառավարությունը Չինաստանին մեղադրում է ոչ թափանցիկ ռազմական նախապատրաստությունների, տարածաշրջանի ծովային ուղիները վերահսկողության տակ առնելու, Թայվանի գոտում լարվածության սրման մեջ։ Պեկինն, իր հերթին, ԱՄՆ-ի եւ Ճապոնիայի քաղաքականության մեջ տեսնում է իր գործերին միջամտություն, սպառազինությունների մրցավազք սանձազերծելու եւ տարածաշրջանում լարվածության սրման փորձեր։

Սինգապուրում կայանալիք համաժողովի ընթացքում սպասվում է նաեւ Չինաստանի պաշտպանության նախարարի անձնական հանդիպումը Պենտագոնի ղեկավար Լլոյդ Օսթինի հետ։

«Շանգրի-Լա երկխոսությունն» ավանդաբար ամեն տարի անցկացվում է Սինգապուրում, սակայն վերջին երկու տարիներին ֆորումը չեղարկվել էր կորոնավիրուսի համավարակի պատճառով։