Բայդենն ու Թրյուդոն քննարկել են Ռուսաստանի դեմ պատժամիջոցները եւ Ամերիկայի երկրների ապագա գագաթաժողովին մասնակցությունը

ԱՄՆ նախագահ Ջոզեֆ Բայդենն այսօր զրուցել է Կանադայի վարչապետ Ջասթին Թրյուդոյի հետ։ Այս մասին հայտնում է Սպիտակ տան մամուլի ծառայությունը։

Երկու առաջնորդներն ընդգծել են Ուկրաինայում դաժան գործողությունների համար Ռուսաստանին պատասխանատվութան ենթարկելու իրենց հանձնառությունը, ինչպես նաեւ դիտարկել են Ուկրաինայի կառավարության անվտանգության ապահովմանն ու բռնությունից տուժած միլիոնավոր ուկրաինացիներին տնտեսական եւ հումանիտար օգնություն ցուցաբերելու շարունակական ջանքերը:

Ընդգծվում է նաեւ, որ ԱՄՆ նախագահը «բարձր է գնահատել Կանադայի սերտ գործընկերությունը ճգնաժամի ընթացքում եւ նրա առաջնորդությունը Ռուսաստանի նկատմամբ համապարփակ պատժամիջոցներ եւ սահմանափակումներ կիրառելու գործում»։

«Առաջնորդները նաեւ քննարկել են հունիսին Ամերիկայի գագաթաժողովին իրենց առաջիկա մասնակցությունը եւ կիսագնդում կանաչ ու արդար աճի իրենց ընդհանուր տեսլականը, ինչպես նաեւ գագաթաժողովի այլ նպատակներ»,- ասվում է Սպիտակ տան մամուլի հաղորդագրության մեջ: