Լոս Անջելեսում Հայոց ցեղասպանության 107-րդ տարելիցին նվիրված միջոցառումներ կանցկացվեն

Ամերիկահայերը կիրակի հավաքվում են Լոս Անջելեսի ողջ շրջանում, որտեղ մի քանի միջոցառումներ են տեղի ունենալու՝ նվիրված Հայոց ցեղասպանության 107-րդ տարելիցին, հայտնում է ABC 7 Los Angeles-ը:

Մասնավորապես, Լոս Անջելեսում կիրակի 15:00-ին Հայկական երիտասարդական միությունը բողոքի ակցիա կիրականացնի Թուրքիայի հյուպատոսության շենքի մոտ՝ պահանջելով թուրքական կառավարությունից ճանաչել Ցեղասպանությունն ու դադարեցնել աջակցությունն Ադրբեջանին:

Լոս Անջելեսում բնակվում է ամերիկահայերի ամենամեծ համայնքը. 2011 թ. ամերիկյան հասարակական հարցման տվյալներով՝ շրջանում 214 328 հայ է ապրում:

Կալիֆոռնիայի նահանգապետ Գեւին Նյուսոմը հռչակագիր է արձակել՝ 2022 թ. ապրիլի 24-ը հայտարարելով նահանգում Հայոց ցեղասպանության զոհերի հիշատակության օր: