Փաշինյանը Հայաստանը տանում է դեպի պատերազմ եւ կարող է այն վերածել հակառուսական պլացդարմի․ Վահե Հովհաննիսյան

Փաշինյանի հայտարարությունը նոր էջ բացեց Հայաստանի պատմության մեջ, հին պատկերացումներն ու ձեւաչափերն այլեւս չկան։ Նման հրեշավոր հայտարարություններից հետո նա չի կարող շարունակել զբաղեցնել երկրի ղեկավարի աթոռը, Փաշինյանը պետք է հրաժարական տա։ Սակայն առանց հետագա քայլերի մասին պատկերացնելու անհնար է փոփոխությունների հասնել, ժողովրդին պետք է ցույց տալ ապագան։ Այս մասին ապրիլի 15-ին կայացած քննարկման ժամանակ հայտարարեց ՀՀ ԱԺ նախկին պատգամավոր, «Այլընտրանքային նախագծեր» խմբի փորձագետ Վահե Հովհաննիսյանը։

Նրա խոսքով՝ իշխող խմբակցության պատգամավորների ծափահարությունները ցույց են տալիս, որ նրանք ստորագրում են Փաշինյանի ելույթի տակ, որից հետո կորցրել են երկրի համար օրենքներ ընդունելու բարոյական իրավունքը։

«Եթե Փաշինյանի արտահայտած դրույթներն իրականություն դառնան, Հայաստանը կդառնա հիմնական հակառուսական պլացդարմ։ Ռուսաստանը դա պետք է լավ հասկանա։ Պատահական չէ այն հակառուսական քարոզչությունը, որ տարվում է ռուսական զորախմբի դեմ»,-ասաց Հովհաննիսյանը։

Նա նկատեց, որ Փաշինյանի հեռանալը, սակայն, չի նշանակում, որ Հայաստանի համար ավտոմատ կերպով բարենպաստ որոշումներ կկայացվեն։

«Լավ է, եթե մեզ հաջողվի խուսափել վատագույնից։ Նախ պետք է փոխել այն նարատիվը, որ Նիկոլը խաղաղություն է, իսկ մնացածը՝ պատերազմ։ Այս նարատիվի գոյությունը համարում եմ քաղաքական ուժերի ամենամեծ ձախողումը, որոնք նոյեմբերի 9-ից հետո չկարողացան փոխել այս իրավիճակը։ Հայաստանի վերականգնման համար գաղափարներ չձեւակերպվեցին։ Ակցիաներ, հանրահավաքներ, գործադուլներ․ ամեն ինչ արվեց, բացի այլընտրանք նշելուց։

«Այն ուժը, որը տարավ դեպի պատերազմ, հանգեցրեց պարտությունների եւ զոհերի, այժմ խոսում է խաղաղության գաղափարի մասին։ Սա աբսուրդ է։ Դրա մեղքն առաջին հերթին քաղաքական ուժերինն է։

Նիկոլը զիջումների միջոցով չի գնում խաղաղության, նա ուղղակիորեն մեզ տանում է դեպի պատերազմ, եւ նրա հեռանալը պետք է լինի արժանի խաղաղություն ապահովելու ունակ ուժերի գալու երաշխիք։ Ցանկացած այլ բանաձեւ երկրում քաոսի կբերի։ Սա շատ բարդ խնդիր է»,-ընդգծեց փորձագետը։

Նա հիշեցրեց, որ 30 տարի Հայաստանում իշխանությունները պայքարել են անցյալի դեմ։

«Սա նույնպես աբսուրդ է։ Անցյալի նկարագրությունը լուծում չէ, պետք է պայքարել ոչ թե անցյալի դեմ, այլ ապագայի համար։ Լեւոն Տեր-Պետրոսյանի հոդվածը, Կազանը եւ այլն․ այս ամենն անցյալում է։ Հիմա անձնական հարցերը լուծելու ժամանակը չէ, պետությունը սրընթաց դեգրադացվում է»,-ասաց Հովհաննիսյանը։

Նախկին պատգամավորն առաջարկեց մարդասիրական խոշոր ծրագիր իրականացնել «Խաղաղ Արցախ» կարգախոսով, որը կարող է բարձրացնել վստահությունն Արցախի ապագայի նկատմամբ։

«Քանի դեռ Ռուսաստանն ուժեղ է, Ադրբեջանը լայնածավալ արկածախնդրության չի գնա, եւ մենք պետք է օգտվենք դրանից եւ ամրապնդենք խաղաղ կյանքն Արցախում»,-եզրափակեց փորձագետը։