Իլոն Մասկը հայտնել է, որ պատրաստ է գնել Twitter-ի բոլոր բաժնետոմսերը

Ամերիկացի գործարար եւ աշխարհի ամենահարուստ մարդը՝ Իլոն Մասկը, պատրաստ է գնել Twitter-ի բոլոր բաժնետոմսերը յուրաքանչյուրը 54.2 դոլարով, ասվում է ԱՄՆ արժեթղթերի եւ բորսաների հանձնաժողով ներկայացված փաստաթղթերում:

Ընկերության բաժնետոմսերը նախնական աճուրդում արդեն իսկ թանկացել են 13 տոկոսով։

«Ես առաջարկում եմ գնել Twitter-ի բաժնետոմսերի 100 տոկոսը մեկ բաժնետոմսի համար 54.20 դոլարով, 54 տոկոս պրեմիայով՝ Twitter-ում ներդրումներս սկսելու նախորդ օրվա համեմատ եւ 38 տոկոս պրեմիայով՝ իմ ներդրման մասին հրապարակային հայտարարությանը նախորդած օրվա համեմատ: Իմ առաջարկը լավագույնն է եւ վերջնական, եւ եթե այն չընդունվի, ես ստիպված կլինեմ վերանայել իմ՝ որպես բաժնետիրոջ դիրքորոշումը»,- ասված է Մասկի դիմումին կից նամակում։